Archive pour mai, 2012

Toni zirenga 25 z’intwaro n’amasasu zakuwe mu isambu ya Gen Ntaganda

Toni zirenga 25 z’intwaro n’amasasu zakuwe mu isambu ya Gen Ntaganda 25_tonnes_armes_recuperees_bosco_ntaganda_cavale4

Toni zirenga 25 z’amasasu n’intwaro zakuwe mu isambu ya Gen Bosco Ntaganda hafi ya Mushaki muri Masisi, nyuma y’imirwano ikomeye yabaye hagati y’amatariki ya 29 Mata na 4 Gicurasi 2012, ingabo za Congo (FARDC) zihanganye n’abasirikare bigometse bari bashyigikiye Gen Bosco Ntaganda wahoze ari umugaba mukuru w’ingabo za CNDP.

Muri izo ntwaro harimo, intwaro nini ka za mortiers/mortars, za canons sans recul/recoilless n’izindi mbunda nto. Zimwe mu ntwaro zeretswe Gouverneur wa Kivu y’Amajyaruguru Bwana Julien Paluku mu gihe yari mu rugendo rwo gukangurira abaturage gusubira mu byabo muri Masisi.

25_tonnes_armes_recuperees_bosco_ntaganda_cavale1

Mu cyumweru gishize, igihe ingabo za Congo (FARDC) zendaga gufata agace ka Mushaki, Gen Ntaganda n’abasirikare bamushyigikiye berekeje muri Territoire ya Rutshuru yegeranye n’umupaka w’u Rwanda. Mu ijoro ryo ku wa mbere tariki ya 7 Gicurasi 2012, barasanye bikomeye n’ingabo za Congo (FARDC) ahagana i Kibumba.

Hari amakuru avuga ko Gen Ntaganda ari muri Pariki ya Virunga hafi ya Kibumba hegereye umupaka w’u Rwanda. Kubera ko ngo u Rwanda rwari rwafunze umupaka warwo abo basirikare bigometse ntabwo bashoboye kwinjira mu Rwanda.
Ingabo za Congo zari zahaye abo basirikare bigometse iminsi 5 ngo babe basubiye mu ngabo. Byavugwaga ko abo basirikare bazakirwa neza nibagaruka mu murongo ariko ngo nibanga hagombaga gukoreshwa ingufu.

Marc Matabaro

Rwiza News

Iryavuzwe riratashye Col Makenga yasimbuye Gen Bosco Ntaganda

Iryavuzwe riratashye Col Makenga yasimbuye Gen Bosco Ntaganda makenga_sultani3

Colonel Sultani MAKENGA

Ingabo zo ku ruhande rwa Gen Bosco Ntaganda zigumuye kuri Leta ya Kinshasa kuri uyu wa kabiri zatangaje ko Bosco Ntaganda yasimbuwe ku buyobozi bwazo.

Nkuko bitangazwa na BBC, izi ngabo ziyise M23 zigiye kuyoborwa na Col Sultani Makenga nawe wavuye mu ngabo za Leta, akaba asimbuye Ntaganda.

Ingabo za Leta kuwa mbere tariki 8, zatangaje ko zigaruriye uduce twose twa Masisi twari twafashwe na Ntaganda, ndetse ko agahenge kagarutse nkuko byemejwe n’umugaba mukuru Lt Gen Didier Etumba wanavuze ko ingabo za Ntaganda zihawe kugeza kuwa gatatu tariki 09 Gicurasi nk’umunsi wa nyuma wo gushyira intwaro hasi.

Gusimbuza Gen Ntaganda bivugwa ko ari uburyo bwo kumuhungisha ibyaha akomeje gukurikiranwaho, ndetse akaba anashakishwa n’urukiko mpuzamahanga rwa La Haye. Nubwo Ntaganda we abihakana.

Ntaganda ashinjwa na ICC gushyira abana mu gisirikare kimwe n’uwo bahoze bakorana Thomas Lubanga wabihamijwe i La Haye.

Itangazo ryasinyweho na Lt Col Vianney Kazarama rivuga ko ingabo zahoze ari iza CNDP ubu zishyize mu mutwe witwa M23 ugomba gukurikiza amabwiriza azajya atangwa na Col Sultani Makenga.

Iri tangazo rivuga ko Ingabo zabo zavuye muza Leta kuko zafatwaga nabi kandi zitanahembwaga.

Lt Col Vianney Kazarama yabwiye BBC ati: “ Guverinoma ya Congo ntiyubahirije amasezerano twagiranye mu 2009 niyo mpamvu twitandukanyije nabo, turashaka ko Leta yongera ikumvikana natwe bushya”

Col Sultani Makenga wasimbuye Gen Ntaganda afatwa nk’umurwanyi ukomeye mu ntambara zagiye zibera muri kariya gace. Makenga n’ingabo yari ayoboye zinjijwe mu gisirikare cya DRCongo muri (Brassage ya 2009) mu minsi yashije basanze mugenzi wabo Ntaganda n’ingabo ze bahoranye bose mu ngabo za CNDP.

Umuvugizi w’ibikorwa bya gisirikare bya DRC mu ntara za Kivu zombi Lt Col Sylvain Ekenge tariki 6 uku kwezi ari mu mugi wa Goma, yatangaje ko abasirikare 80 bayobowe na Col Makenga batorotse nabo igisirikare cya Leta, Ekenge yavuze ko Col Makenga ashobora kuba yarahungiye mu Rwanda.

Ibi Col Makenga yabihakaniye kure yemeza ko yavuye i Bukavu n’ingabo ze baca za Kalehe berekeza i Goma akomeza yerekeza iya Rutshuru ari naho ngo ari ubu nkuko yabitangarije BBC.

Imirwano hagati y’Ingabo za Leta ya DC Congo n’abazigumuyeho yatumye abaturage barenga 20 000 bava mu byabo, muri aba abagera ku 5 800 ubu bamaze kwakirwa mu nkambi ya Nkamira mu Rwanda.

Hari amakuru yavugaga ko u Rwanda na Congo barebaga uburyo bakwikiza Gen Ntaganda nk’iko babigenje kuri Gen Nkunda ariko ibikorwa byabo mu burasirazuba bwa Congo bigakomeza bashaka undi basimbuza Gen Ntaganda. Rero iryavuzwe riratashye nk’uko hari abari bavuze ko Gen Ntaganda agiye gushaka ahantu yaba yihishe hari umutekano nko mu Rwanda mu gihe yaba areba uko ibintu bigenda. Kujya mu Rwanda kwa Gen Ntaganda bishobora kugirana kuko byahesha u Rwanda isura mbi.

Izina ry’izo nabo zogometse “M23″ risobanura (Mouvement du 23 mars  2009)

Mu gitondo cya kare ku ya 8 Gicurasi 2012, imirwano yongeye kubura i Kubumba muri Territoire ya Nyiragongo, munsi y’ibirunga bya Mikeno na Karismbi n’mimisozi ya Hehu, ku mupaka w’u Rwanda na Congo! Abaturage bari bahunze bageze ahitwa Kibati.

Marc Matabaro

Rwiza News

MAJOR CGSC ALOYS NTABAKUZE yakatiwe imyaka 35

MAJOR CGSC ALOYS NTABAKUZE yakatiwe imyaka 35 313119_10150372529324468_680214467_9867398_9622001_nAmakuru dukesha Agence Hirondelle, aravuga ko kuri uyu wa kabili tariki ya 8 Gicurasi 2012, Urugereko rw’ubujurire rw’urukiko mpuzamahanga mpanabyaha rwashyiriweho u Rwanda rwa Arusha (TPIR/ICTR) rwagabanyirije igihano Major CGSC Aloys Ntabakuze wahoze ategeka Bataillon Paracommando mu Nzirabwoba (Les Forces Armées Rwandaises).

Nk’uko byatangajwe n’umucamanza Theodor Meron, urwo rugereko rwakuyeho igihano cyo gufungwa burundu gisimbuzwa gufungwa imyaka 35.

Tariki ya 18 Ukuboza 2008, Major CGSC Ntabakuze yari yahamijwe icyaha, nk’umukuru wari uyoboye abasirikare (supérieur hiérarchique), ibyaha bya génocide, ibyaha byibasiye inyokomuntu, ibyaha by’intambara, kubera ibikorwa byaba byarakozwe n’abasirikare ba Bataillon Paracommando yayoboraga mu duce dutatu tw’umujyi wa Kigali.

Urugereko rw’ubujurire rwamuhanaguyeho ibyaha byakozwe n’interahamwe, kuko Major CGSC Ntabakuze atigeze amenyeshwa mu byo yarezwe ko yari akurikiranywe ku ruhare akekwaho mu byaha byakozwe n’interahamwe.

Urwo rugereko rwemeje ibihano ku byaha byaba byarakozwe na bamwe mu basirikare ba Bataillon Paracommando mu gace ka Kabeza. Abacamanza besanze ko abakoze ibyo byaha ku Kabeza batari bayobowe na Major CGSC Ntabakuze ubwe. N’ubundi hari bamwe mu baparakomando bari boherejwe kurinda Président Juvénal Habyarimana, abo ntabwo bari ku mategeko rya Major CGSC Ntabakuze.

Mu rubanza mu rukiko rw’ibanze, Major CGSC Ntabakuze yari mu rubanza rumwe na Colonel BEMS Théoneste Bagosora, ndetse na Lieutenant-Colonel BEMS Anatole Nsengiyumva, icyo gihe bose bari bakatiwe gufungwa burundu. Ariko nyuma Colonel BEMS Bagosora yagabanyirijwe igihano mu bujurire akatirwa imyaka 35 naho Lieutenant-Colonel BEMS Anatole Nsengiyumva yakatiwe imyaka 15 kuko yari ayimaze muri Gereza ahita arekurwa.

Ariko kubera ko uwunganira Major CGSC Ntabakuze atari ahari mu kujurira tariki ya 30 Werurwe 2011, urubanza rwa Major CGSC Ntabakuze rwarasubitswe, yaburanye mu bujurire tariki ya 27 Nzeli 2011.

Umwe mubunganira Major CGSC Ntabakuze ni umunyamerika Professor Peter Erlinder wigeze gufungirwa mu Rwanda.

Major CGSC Aloys Ntabakuze ni muntu ki?

Aloys Ntabakuze yavutse mu 1956, avukira mu cyahoze ari Komini Karago, mu cyahoze ari Gisenyi. Yize amashuri yisumbuye ku Musanze. Yinjiye mu ishuri rikuru rya gisirikare (ESM) i Kigali mu 1975 muri promotion ya 16. Yasohotse muri iryo shuri mu 1978 ari Sous-Lieutenant. Yabaye muri Police Militaire na Bataillon Garde Présidentielle. Nyuma yasubiye muri Police Militaire aho yagizwe umukuru w’uwo mutwe kugeza mu 1987. Aho yavuye ajya kwiga mu ishuri rya gisirikare Command and General Staff College (CGSC) rya Fort Leavenworth muri Kansas muri Leta zunze ubumwe z’Amerika (iri shuri niryo Perezida Kagame yizemo ariko ntabwo yarirangije). Arangije muri iryo shuli yoherejwe gutegeka Bataillon Paracomando i Kanombe asimbuye Nyakwigendera Colonel Stanislas Mayuya.

Mu Kwakira 1990, yari Commandant yoherejwe ku rugamba mu Mutara, we na Bataillon Paracommando bari muri Sous-Secteur Ngarama yari iyobowe na Nyakwigendera Général Major BEM Déogratias Nsabimana. Abasirikare ba Bataillon Paracommando bari mubatsinze ibitero bya mbere bya FPR ahitwa za Ngarama na Mimuli mu Kwakira 1990.

Hagati ya 1990 na 1994, Major CGSC Ntabakuze na Bataillon Paracommando boherejwe henshi ku rugamba aho rwari rukomeye, we n’abasirikare be bari mubagoye cyane ingabo za FPR. Ndetse yanakomerekeye ku rugamba.

Muri Mata 1994, ayoboye Bataillon Para bashoboye gusubiza inyuma ingabo za FPR zashakaga gufata ikibuga cya Kanombe, we n’abandi basirikare b’inzirabwoba bihagazeho kugeza mu kwezi kwa Gicurasi 1994 ubwo Inzirabwoba zavaga mu gace ka Kanombe. Yarwanye kandi muri Muyira, Nyanza, no muri Gitarama. Nyuma y’ifatwa rya Gitarama na Kigali, we n’abasirikare yayoboraga bari mu basigaye inyuma barwana imirwano yo gutinza ingabo za FPR kugira ngo abaturage bashobore guhunga.

Icyo urukiko ruvuga rwagendeyeho cyane rumuha igihano kiremereye kuriya ngo ni uko atabujije abasirikare be kwica abantu cyangwa ngo abahane. Ariko harimo kwigiza nkana. None se habayeho gushyira mu gaciro Major CGSC Ntabakuze nka commandant wa Bataillon ntabwo yashoboraga kuba ahantu hose hari abasirikare yari ayoboye icyarimwe. Ikindi mubyo bamurega nta na hamwe bavuga ko yatanze amategeko yo kwica. Harimo kwirengagiza ko hari igihe cy’intambara, guhana abasirikare ikivunga byashoboraga gutera icyuho bigaha imbaraga FPR bari bahanganye, ikindi abasirikare ba Police Militaire bari bashinzwe gufasha guhana ibikorwa nk’ibyo by’ubwicanyi bari bahanganye n’ingabo za FPR zari zateye ikigo cyabo cya Kami.

Abakurikiye urubanza rwe bemeza ko guhanwa ku byaha atakoze ku giti cye, ndetse bakaba barashatse kumugerekaho ibindi byaha nko gutegura genocide n’ibindi, impamvu y’ingenzi n’uko ari umwe mu babangamiye FPR mu gufata ubutegetsi ku buryo bworoshye kuva mu 1990 kandi kuba yaravukaga muri Komini imwe na Perezida Habyalimana ari muri bamwe amahanga yabonaga agomba kugekaho ibyabaye mu Rwanda.

Mu minsi yashize umwana we, n’uwo bashakanye bitabye Imana ubu asigaranye abana 3.

Imana imufashe we n’umuryango we.

Marc Matabaro
Rwiza News

TWASESENGUYE IKIGANIRO RADIO ITAHUKA YAGIRANYE NA LT GEN KAYUMBA NA COL KAREGEYA

TWASESENGUYE IKIGANIRO RADIO ITAHUKA YAGIRANYE NA LT GEN KAYUMBA NA COL KAREGEYA Kayumba-Nyamwasa1-150x150

Lt Gen Kayumba

Umutekano muke muri Congo na Gen Bosco Ntaganda

Ntabwo wagira icyo ubaza Gen Ntaganda utabajije Kagame, ni ukuvuga ko nta kabuza Gen Ntaganda azicwa kugira ngo atazashinja Kagame!

Dukurikije ibyavuzwe n’aba bagabo bombi biragaragara ko Kagame atazava muri Congo ko kandi intambara itigeze ihagarara kuva mu 1996. Mbese umuti w’ikibazo cyo mu burasirazuba bwa Congo uri i Kigali.Icyo wenda Kagame azakora ni ukujya ahindura abamukorera muri Congo, ubu Gen Ntaganda arashakishwa, ariko ubu hari undi urimo gutegurwa ngo ahagararire inyungu za Kagame muri Congo dore ko Kabila ari kure kugirango ashobore gushobora kugira icyo akora muri kariya gace kabaye nk’akarima ka Kagame. Dore ko Kabila asa nk’uwahahaye u Rwanda.

Kandi ngo Kagame arashaka gukoresha ikibazo cya Congo kugira ngo yongere avugane n’amahanga nk’umuntu ushobora gufasha gukemura ikibazo cya Congo (kandi ariwe wagiteje) kuko ubu Kagame nta hantu akisanga mu mahanga.

Ikindi cyavuzwe kuri iyi ngingo ni ahantu Lt Gen Kayumba yakoresheje izina rya Gen Kabarebe amwita:”James” inshuro nyinshi.
Wenda hari ababyita spéculation ariko njye siko mbibona. Ubundi umuntu yita umuntu izina rye rya gikirisitu (prénom/first name) akaba ari ryo akoresha cyane, akenshi ni uko uwo muntu aba ari inshuti, umuvandimwe cyangwa undi muntu wisangaho. Ntabwo bimenyerewe ko umuntu akoresha ubwo buryo avuga umuntu bahanganye. Iyo umuntu agarutse ku magambo Lt Gen Kayumba na Col Karegeya bakunze kuvuga ko abari mu gisirikare abenshi ari ingwate badafite ijambo, bituma abantu benshi bibaza amaherezo y’ibibera mu Rwanda kuko bisa nk’aho abari muri RNC n’abari muri Leta bafitanye ubumwe bw’igihe kinini budashobora gupfa gushira n’iyo haba hari ibibazo bw’ubwumvikane bucye.

Karegeya-150x150

Col Karegeya

Uburyo Inzego z’umutekano n’iperereza mu Rwanda zikora

Ndetse habajijwe niba hari abantu bari mu buyobozi ndetse no mu gisirikare cya kera bahaga amakuru FPR ikiri mu ishyamba, n’uburyo bakoraga n’amakuru bahaga FPR agaciro yari afite n’uruhare yaba yaragize mu ntsinzi ya FPR, niba abo bantu ubu bari mu buyobozi mu Rwanda cyangwa hari abari hanze y’igihugu?

Iki kibazo cy’abakoreraga FPR muri Leta ya kera ari Lt Gen Kayumba ari Col Karegeya ntabwo bashoboye kugisubiza, twizere ko ari ukwibagirwa bisanzwe wenda ubutaha bazagisubiza.

Ku bijyanye n’uburyo inzego z’iperereza zikora aho ngo bamwe bakora ibikorwa ababakuriye batabizi bakurikije amategeko avuye kwa Kagame cyangwa abantu bari hafi ye, bigaragaza ko kuba Kagame yarashatse kwica Lt Gen Kayumba, ari Lt Gen Kayumba ari Col Karegeya batabishyira kuri FPR yose cyangwa inzego zose zishinzwe iperereza. Uku gushaka kutibasira abari mu nzego mu Rwanda kwerekana ko hashobora kuba hari imikoranire y’ibanga ku buryo Kagame atitonze iminsi ye yaba ibarirwa ku ntoki.

Hari amagambo yakoreshejwe na Col Karegeya aho yavuze ko ngo abari muri Leta y’u Rwanda n’inzego z’iperereza babeshya kuva kera, yakoresheje aya magambo:”….twarabeshyaga ntacyo twemeraga n’abantu twabaga twishe twarabihakanaga….” aha umuntu yakwibaza niba Col Karegeya yaravugaga ibikorwa yabaga ayoboye ku giti cye cyangwa yavugaga ibyabaga byakozwe na system yose y’iperereza ya Kagame.

Itangwa ry’amapeti ku basirikare b’ubwoko bumwe

Kagame ngo niwe witangira amapeti ku giti cye,  ngo ibibi bikorwa ubu biruta ibyakorwaga ku butegetsi bwa Perezida Habyalimana.

Kagame ashyira hejuru abantu bamubona nk’ikigirwamana, atinya abantu bamaze igihe mu kazi batangiye kumutinyuka bashobora kuvuga ibyo banenga. Rero Kagame ashobora kuba ashaka gushyira ingufu nyinshi mu gushaka gushimisha abatutsi bamwe na bamwe kugira ngo acemo ibice abanyarwanda bityo ashobore kubategeka ku buryo bworoshye.

Ifungwa n’ifungurwa rya Lt Gen Ibingira n’ikibazo kijyanye n’abandi basirikare bari bafunze

Ni uburyo bwo gutera ubwoba abasirikare ngo bashobore kuba munsi ye ajye abakoresha ibyo ashatse byose, kubera ko aba yabatesheje agaciro.

Kagame yigize urukiko rufunga rugatanga n’imbabazi igihe rushakiye. Cyane cyane ko ibyo abo bantu baba bafungiye bitagatagazwa ngo bimenyekane. Ntawavuga ko baba barengana, ahubwo wenda hari amakosa baba bakoreye Kagame ku giti cye muri ubwo bujura kuko nta musirikare ufite urwego rwo hejuru ushobora kwinjira muri Congo nta ruhushya rwa Kagame.

Ikiganiro hagati ya Marc Matabaro na Padiri Thomas Nahimana ku kibazo cy’uko Lt Gen Kayumba atagomba gukora politiki

Bigaragare ko Lt Gen Kayumba atashimishijwe n’uburyo Padiri Nahimana yamwise umwicanyi, ariko urugero Lt Gen Kayumba yahaye Padiri Nahimana rujyanye na Gen Kabiligi ko yagizwe umwere n’urukiko rwa Arusha kandi ariwe wari uyoboye imirwano ku ruhande rw’Inzirabwoba mu 1994, mu gihe uwari umukuriye Gen Bizimungu yahamijwe icyaha (ubu yarajuriye) ndetse n’abari hasi ye, mbona iki gisubizo gihishe byinshi:

-Lt Gen Kayumba n’ubwo asa n’uwasabye imbabazi atekereza ko hari amahirwe y’uko ashobora kuburana agatsinda igihe yaba ageze imbere y’urukiko

-Kuba yaratanze urugero rwa Gen Kabiligi, akanavuga ko yagizwe umwere n’urukiko akabiha n’agaciro, byerekana ko kumvikana hagati y’abasirikare bahoze muri FAR n’abasirikare bahoze muri FPR ku bijyanye n’ubwicanyi byakoroha mu gihe baba bubahanye nk’abasirikare, hatagize ushatse kwitwara kimarayika ngo afate abandi gishitani.

-Kuba Gen Kabiligi avuka i Cyangugu kandi na Padiri Nahimana akaba ariho avuka(ntawe uyobewe ko abanyacyangugu bakundirana) nkeka ko ari impamvu yindi yakumvisha Padiri Nahimana urwo rugero Lt Gen Kayumba yamuhaye

Uburyo izina rya Twagiramungu ryashyizwe mu masezerano y’Arusha

Kuri iki kibazo n’ubwo Bwana Twagiramungu atigeze ku giti cye yibasira Lt Gen Kayumba, biragaragara ko kwibasira Lt Gen Kayumba kwa Padiri Nahimana (yaba abikoze ku giti cye cyangwa abyumvikanyeho na Bwana Twagiramungu) bishobora kugira ingaruka nini kuri Bwana Twagiramungu kurusha ingaruka byagira kuri Lt Gen Kayumba. Hari impamvu nyinshi:

Lt Gen Kayumba na RNC bafite abatutsi benshi bari muri opposition, abatutsi bari muri FPR bakijijinganya bategereje ko bagaragaza ingufu, babari inyuma ndetse n’abahutu babona ko bashobora gufasha guhindura ibintu kuko ntabwo bahakana ko ubwicanyi bw’abahutu bwabaye kandi bagerageje no kubusabira imbabazi, dossier ijyanye n’ubwicanyi kuri abo bose nta gishya kirimo icyo bareba ni inyungu n’icyo babagezaho. Mu gihe Bwana Twagiramungu kuvuga ngo hari abahutu bamuri inyuma nibyo ariko kugaragaza uburyo yaba yarakoranye na FPR (we arabihakana ndetse yasabye ko uwaba abifitiye ibimenyetso yabyerekana) byakwangiza isura ye n’ubundi itari imeze neza.

Kuba Padiri Nahimana ashyigikiye Bwana Twagiramungu bishobora gutuma ingaruka z’ibyo avuga cyangwa yandika amushyigikira zangiza isura ya Bwana Twagiramungu, mu gihe Bwana Twagiramungu yaba abishigikiye cyangwa atanabishyigikiye.

Ikindi gishobora gutuma Bwana Twagiramungu atoroherwa muri iryo hagana n’uko ngo:yanze gusaba imbabazi abahutu ngo nta makosa yabakoreye, cyangwa nawe bataramusaba imbabazi. Aha umuntu akibaza abahutu avuga bagomba kumusaba imbabazi abo aribo. Baba se ari abo mu Gishoma iwabo cyangwa ab’ahandi haguye abo mu muryango we? Cyangwa n’abari mu butegetsi kera?

Kuba Bwana Twagiramungu yaravuze ko adashobora gusaba imbabazi abatutsi mu izina ry’abahutu (mu kiganiro Imvo n’imvano, icyo gihe BBC yabujijwe kuvuga muri FM igihe kitari gito) kuki yumva we abahutu bose bagomba guhaguruka bakajya gushaka umugabo witwa Twagiramungu ngo bamupfukame imbere mu gihe benshi muri bo bumva Bwana Twagiramungu ari mubahaye FPR ubutegetsi? (Bwana Twagiramungu n’amashyaka yari muri opposition bitwaje kurwanya igitugu bateje akajagari mu gihugu kahaye ingufu FPR, Perezida Habyalimana yabashyize muri Leta, ariko ntibanyurwa ntihazagire uhakana ko batari afite ubushobozi n’ubwigenge mu kazi kabo kuko twari duhari twarabibonye uburyo Madame Agatha Uwilingiyimana yahinduye ba Inspecteurs b’amashuri igihugu cyose, Ministères zose zahawe opposition abazikoragamo batari muri opposition barirukanywe cyangwa bimurirwa ahandi. Urundi rugero Bwana Rugenera wari Ministre w’imali yanze ko hagurwa ibikoresho bya gisirikare mu 1994, hari abavuga ko mubyaciye intege inzirabwoba birimo. None se wambwira ko Rugenera atigengaga gute?

Ese mbaze Bwana Twagiramungu washakaga Demokarasi, icyo washakaga kirenze ubwigenge mu myanya mwari mwahawe mu nzibacyuho ni ikihe? Ni umwanya mu Rugwiro? Ubwigenge opposition yari ifite mbere ya 1994 yongeye kubugira nyuma ya 1994 ? Ese ubundi yari ikiri opposition ko yari muri Leta? Ni nka byabindi bajya bavuga ngo Guverinoma ya Kera yateguye Genocide.

Ese Rugenera, Nzamurambaho, Uwilingiyimana, Lando n’abandi ko bari muri iyo Guverinoma nibo bateguye Genocide? Kuvuga ngo nta mwanya w’ubuyobozi Bwana Twagiramungu yari afite ni ukwijijisha, ninde uyobewe ko abaministres b’amashyaka ataravugaga rumwe na Perezida Habyalimana bumviraga ba Perezida b’amashyaka yabo kurusha Perezida w’igihugu?

Ku bijyanye no kwandikwa mu masezerano y’Arusha kwa Bwana Twagiramungu ngo byakozwe na FPR, nabyo umuntu yabyibazaho: (dufate ko Bwana Twagiramungu atari abizi)Uko bigaragara ni uko FPR yabonaga ko Bwana Twagiramungu atari agifite ingufu muri MDR, ko iyo uwo mwanya uhabwa MDR nk’ishyaka byari gutuma MDR wenda muri Kongere (Congrès) nk’iyabereye ku Kabusunzu yari gutora undi Ministre w’Intebe utari korohera FPR nk’uko Bwana Twagiramungu yari kubikora. Uretse ko uko tuzi FPR, nta kiyivaho uretse imbyiro, yari kuba ica iki Bwana Twagiramungu?

Gushaka kumushyira imbere nk’umwere mu rugamba rwa Padiri Nahimana rwo kwirukana ”abicanyi bose baba abahutu cyangwa abatutsi” muri politiki bishobora kuzura akaboze n’ubwo bwose ubwo bugambanyi buvugwa bwa Bwana Twagiramungu butajyanwa mu rukiko ariko ibyo abahoze muri FPR batangaza bishobora kwangiza isura ya Bwana Twagiramungu ku buryo bworoshye.

Icyaba cyiza n’uko Bwana Twagiramungu yasaba Padiri Nahimana kutamushyira imbere mu rugamba rwe rw’ukuri n’ubutabera nk’uko uwo mugabo wihaye Imana abivuga cyangwa niba babiziranyeho bagahindura stratégie.

Abayobozi b’abahutu bari muri Leta n’udukingirizo

Icyagaragaye n’uko abo bagabo bemeje ibyo abantu benshi bakunze kuvuga ko abanyapolitiki bari muri Leta b’abahutu ari udukingirizo gusa, icyo abo bagabo bemeje uretse ko abenshi bari basanzwe babizi ni uko James Musoni, Ministre w’Ubutegetsi bw’Igihugu ariwe ukurikiye Kagame mu butegetsi, ari Ministre w’intebe, ari Perezida wa Sena n’abandi bose babanza kumubaza.

Ingendo za Kagame n’umugore we muri Uganda ni uguhakwa

Kandi uko bivugwa n’aba bagabo ntabwo izo ngendo za Kagame kwa Museveni ntacyo zizahindura kuri gahunda Museveni yaba afite ku Rwanda. Bigaragaza ko umubano utifashe neza kuko umubano ubaye wifashe neza habaho ingendo nyinshi za Museveni mu Rwanda zijya kungana n’izo Kagame akorera muri Uganda.

Urugendo rwa Lt Gen Karenzi Karake muri Afrika y’Epfo

Mu gusubiza iki kibazo Lt Gen Kayumba yasobanuye ko Afrika y’Epfo ari igihugu gifite demokarasi kandi ko iby’u Rwanda rwavuga byose ntacyo byahindura mu mikorere yacyo. Yavuze ko abandi bayobozi bose bo mu Rwanda bashobora kujya muri Afrika y’Epfo uko bashatse ariko ngo Perezida Kagame niyibeshya akahagera bazamugaragaza uko ari!

Kuba Kagame aheruka muri Afrika y’Epfo nibyo aherukayo mu muhango wo kwizihiza imyaka 100 ishyaka ANC ryari rimaze rishinzwe muri Mutarama 2012, ariko nkurikije ubutumwa nisomeye nkanatangaza kuri uru rubuga hagati ya Ambassadeur Karega, Senateri Gasamagera na Umukuru wa Sena Ntawukuriryayo, hagaragaye ibyishimo bidasanzwe by’uko iyo mihango yari yabereye ahitwa Bloemfontein ngo kure y’aho abayoboke ba RNC bashoboraga kwigaragambiriza, ibyo bikaba byerekana ubwoba ndetse ko Kagame agiye muri Afrika y’epfo yakwakirwa n’induru.

Ikindi Lt Gen Kayumba yavuze sinzi niba yaravuze akomeje cyangwa bimucitse yagize ati: ”…Karenzi we ntacyo dupfa…”. Iyo umuntu yibutse ko Lt Gen Karenzi Karake ariwe ukuriye NSS (inzego z’iperereza z’u Rwanda) ariwe wa mbere waba ushinzwe guhiga Lt Gen Kayumba, kuba Lt Gen Kayumba avuga ko ntacyo bapfa njye nibaza byinshi:
-Ese koko ibivugwa ko RNC ifite abantu muri Leta y’i Kigali bayikorera byaba ari impamo?
-Ese ibivugwa ko ikibazo kuri Lt Gen Kayumba ari Kagame atari system yose ya FPR byaba ari byo?
-Ese aho Kagame ntiyaba yaratangatanzwe impande zose akaba asigaje igihe gito?
-Ese ntihaba hari benshi mu buyobozi mu Rwanda baba bashaka amahinduka ariko bagakomeza kujijisha Kagame?

Mushobora kwiyumvira icyo kiganiro hano hasi:

http://www.blogtalkradio.com/radioitahuka/2012/05/07/radio-itahuka-ijwi-ryihuriro-nyarwanda

Marc Matabaro

Rwiza News

Minisiteri y’Umutekano yanze icyifuzo cyo kurekura imfungwa zirengeje imyaka 70

Minisiteri y’Umutekano yanze icyifuzo cyo kurekura imfungwa zirengeje imyaka 70 Rwarakabije

Minisiteri y’Umutekano mu gihugu yateye utwatsi icyifuzo cy’urwego rw’igihugu rushinzwe imfungwa n’abagororwa (RCS) rwari rwasabye ko abagororwa barengeje imyaka 70 y’amavuko bajya bahita barekurwa hatitawe ku byaha zakoze.

Umukuru w’uru rwego, Gen Paul Rwarakabije, yari aherutse kumvikana mu bitangazamakuru mpuzamahanga yemeza ko bahisemo gusaba Guverinoma ko “abageze mu zabukuru bajya barekurwa kuko baba bamaze kugororwa bihagije”

Rwarakabije kandi yatangaje ko ngo iki cyifuzo cyabo gishingiye ku kuba “imibare igaragaza ko abashaje benshi bapfira muri gereza”.

Icyo gihe, yatanze urugero avuga ko imibare igaragaza ko abagororwa bakuze bagera ku 2.000 bapfuye bazize indwara bari bageze mu zabukuru.

“Turasaba umuryango Nyarwanda na Guverinoma ko babyemera umuntu ufite imyaka igera kuri 70 akajya arangiriza igihano cye hanze ya gereza”.

Nyamara, minisiteri y’umutekano mu gihugu, ari nayo ireberera urwego rw’imfungwa n’abagororwa, yatangaje ko iki cyifuzo ntacyo yigeze igezwaho.

Umunyamabanga uhoraho muri iyi minisiteri, Valens Munyabagisha avuga ko nta tegeko na rimwe ryakwemera iri fungurwa.

Mu butumwa yanditse avuga kuri iki ‘kibazo’, Munyabagisha agira ati “Abantu bagejeje kuri iyo myaka [70] hafi ya bose ni abafungiwe icyaha cya Jenoside kandi itegeko riteganya ko nta fungurwa ry’agateganyo (provisional release/liberation conditionnelle) rishoboka ku muntu wakoze icyo cyaha. Ni ukuvuga ko nuwabisaba bitashoboka”.

“ Kuvuga ko 80% by’abapfa muri gereza ari abafite hejuru y’imyaka 70 sibyo. Raporo dufite ya 2011 irerekana ko bari 28% [naho] muri Gashyantare 2012 bari 24% [by’abapfa]. Cyakora koko nibo benshi ugereranije n’abafite imyaka iri hasi ariko nta gitangaje kuko no mu buzima busanzwe ni ko bimeze”.

Munyabagisha avuga kandi ko U Rwanda ruri mu bihugu bifite umubare muto w’imfungwa n’abagororwa bapfira mu magereza; akemeza ko mu mwaka wose wa 2011 ikigero cy’abapfa cyari ku bagororwa 4.7 ku bihumbi 10 mu gihe nyamara ngo ubundi ikigero cyemewe n’ishami ry’umuryango w’abibumbye ryita ku buzima (OMS) aria bantu 13 ku bihumbi 10.

Uyu muyobozi yemeza kandi ko ubu uyu mubare ugenda ugabanuka “kuko muri Gashyantare 2012 wari 2.92 ku bantu ibihumbi 10”.

“ Iyo mibare irazwi mu bafatanyabikorwa bacu bose ndetse niyo mpamvu ubu nta nzitizi zikibaho mu kohereza abakoze ibyaha bari mu mahanga kuza gufungirwa mu Rwanda; abaza benshi kandi nk’uko mubikurikira basheshe akanguhe. Ntabwo babohereza bazi ko bafatwa nabi”

Uyu muyobozi yemeza ko kuba iyi mibare y’abagwa mu magereza igenda igabanuka ngo biterwa n’ingamba nyinshi zafashwe zirimo kongera umubare w’abaforomo bita ku mfungwa n’abagororwa ndetse no kuba amagereza agenera abasheshe akanguhe amafunguro yihariye.

Ati “ Buri gereza igenera abageze mu zabukuru indyo yuzuye, niyo mpamvu gereza zose zifite imirima y’imboga, zorora inka n’ibindi kugira ngo [abasheshe akanguhe] babone amata”.

“Umuntu wese aryozwa icyaha yakoze hatitawe ku myaka afite”.

Source: Igitondo

FPR IKINYOMA KIRANZE KIRAYISARITSE NONE IRATA IBITABAPFU

Mu gihe FPR igenda ikwirakwiza ibihuha ko Ingabire yemeye ibyaha agasaba imbabazi Kagame kubera ngo ibaruwa yanditse asaba imbabazi, amakuru nashoboye gushakisha ni uko abambari ba FPR bagerageje uko bashoboye begera Ingabire bamubwira ko mu byo avuga ngo akunda kuvugamo umukuru w’igihugu kandi ngo bikaba bimutesha agaciro ngo ko akwiye kubireka kandi akanandika amubwira ko atazabisubira, bikaba kandi byarabaye mu mishyikirano ya rwihishwa Martini Ngoga yagiranye n’uyu mutegarugori w’umunyapolitiki utavuga rumwe na leta ya Kagame. Iyi mishyikirano kandi ngo yatumijwe n’inkoramutima za Kagame yari igamije gushaka uko yakwikura mu bibazo by’urusobe bya politiki byugarije ubutegetsi bwe n’ubwo umushinjacyaha Ruberwa yabyigurukije akavuga ko imishyikirano yasabwe na Ingabire abinyujije ku bamwunganira.

Nyamara n’ubwo bakoze uko bashoboye ngo Ingabire yandike ijambo imbabazi muri iyo nyandiko, amakuru nabashije gutohoza aravuga ko Ingabire muri urwo rwandiko ngo yavuze ko ibyo yavuze haba ari kuri Kagame cg undi mutegetsi uwo ariwe wese bidakwiye kumubabaza kuko hakwiye kubahirizwa ihame rya demokarasi n’ubwisanzure mu kunenga no gutanga ibitekerezo akaba aryo we n’ishyaka rye FDU bemera ngo niba hari uwo byababaje babimubabarira ariko ko badakwiye kureka gukomeza guharanira umuco w’ubwisanzure no gutanga ibitekerezo nta nkomyi kuko ngo ari ryo hame rya demokarasi. Ngibyo ibyo leta ya Kigali yirirwa ikwirakwiza ngo Ingabire yasabye imbabazi. Ese tubisesenguye koko ubu twavuga ko yasabye imbabazi?

Ikindi cyerekana ko leta ya Kagame yahimbye ikinyoma kandi ikigikomeza ni uko ngo batarekeye aho. Amakuru nashoboye gukurikirana avuga ko mu minsi ya vuba bamwe mu ntore za Kagame bagiye muri gereza aho Ingabire afungiye maze batangira kumwumvisha ko yasaba abo bakorana bakareka gukomeza gukwirakwiza inyandiko mu miryango y’uburenganzira bw’ikiremwmuntu no mu bahagarariye ibihugu byabo mu Rwanda n’abanyamahanga bafasha u Rwanda, inyandiko ngo zikomeza kugusha hasi leta ya Kagame kuko ngo ubu nta kindi igikora usibye guhora yisobanura mu bafatanyabikorwa bayo bayibaza niba izo nyandiko leta izizi. Ibi ngo barabimusaba bamubeshya ko bafite ukuntu babigenza ikibazo bafitanye kikarangira mu bwumvikane ariko ntawe uyobewe ko iki ari ikinyoma cya FPR ikoresha ishakisha uko yakwirwanaho mu bihe bikomeye.

Amakuru nanone nashoboye gutara ni uko ngo abayobozi ba FDU bibitseho ibimenyetso bihagije birimo n’inyandiko ziriho imikono ya bene kuzikora zigaragaza nta shiti uburyo leta yakoresheje bariya bahoze ari abasirikari ba FDLR mu gushinja Ingabire ibinyoma ngo bakaba biteguye kuzazishyira ku karubanda igihe Ingabire azaba yakatiwe igifungo dore ko zagombaga kuba zarakoreshejwe mu rukiko ariko kubera iterabwoba ryakorewe umwe mu batangabuhamya ngo byatumye icyo gihe cyo gutanga izo nyandiko kitagerwaho. Icyo gusa naje kumenya ni uko ngo kubera gutinya ko bazazamburwa nk’uko bisanzwe bikorwa n’igisirikari cya FPR, ngo zabitswe mu ikoranabuhanga ku buryo n’iyo baba batakiri no ku isi izo nyandiko zigomba kuzagaragazwa kandi ngo ni ibimenyetso simusiga ndasubirwaho bigaragaza neza uburyo FPR yakoresheje abashinje Ingabire. Bo ngo icyo bakora ni ugukina politiki kandi ngo biranaborohera cyane kuko basanze FPR ntabyo ishoboye. Kuba ngo bajya bafatwa bagafungwa kuri bo ngo ni kimwe mu bituma FPR itsindwa muri politiki kandi bo ntacyo bakoze.

Ikindi nabashije kumenya ni uko ngo muri ruriya rubanza hari kuzanwa abandi batangabuhamya bazi neza kandi bagombaga kwerekana uburyo bariya basirikari bacuzwe mu guhimbira Ingabire ibyaha ariko ngo kuba uwa mbere yaratewe ubwoba byerekanye ko n’abandi batazoroherwa na leta bituma bahagarika kuburana. Ibi rero bikaba biri mu bituma intore za Kagame zitakigoheka zishakisha aho zahera ngo Ingabire abe yagwa mu mutego wazo ariko nyamara abayobozi ba FDU ndibaza ko bazi nabo icyo bakora koko. Muri iriya politiki bakina bakwiye no kuba hafi y’umuyobozi wabo atazakoreshwa amakosa yizezwa ko azafungurwa kandi ari impamvu bashaka baheraho bamukatira icya burundu n’ubwo bitababuza kubikora ariko n’ibyo bimenyetso bakazabishyira ahagaragara bahagaze kuri dosiye nziza nk’uko twabibonye mu iburanisha rya ruriya rubanza.

Muri misiyo y’intore kandi ngo harimo kwemeza Ingabire ko urukiko rukuru niruramuka rumukatiye igihano akwiye kuzajuririra urukiko rw’ikirenga. Ibi barabimwumvisha kugirango barebe ko yagaruka mu rubanza kuko kuba yararavuyemo ni ihurizo ritoroheye leta ya Kigali ku byerekeranye n’ubutabera. Aha mu nama y’abayobozi bakuru b’igihugu minisitiri w’ubutabera Karugarama akaba atarorohewe na shebuja amushinja ko mu butabera birimo kugenda nabi. Nyamara impamvu intore zisirisimba muri gereza zishaka kwemeza ingabire kuzajurira bijyanye n’amakuru yavuye mu nama umuyobozi w’urukiko rukuru rwa Kigali Busingye Johnstone yagiranye n’abacamanza akababwira ko akazi kagikomeza kuko ngo Ingabire azajurira. Abayobozi ba FDU bakaba bakwiye kuba maso ya politiki bakina ntizababane imfabusa.

Ikindi cyerekana ko leta ita ibitabapfu ni uko mu nama Kagame aherutse gukoresha abayobozi bakuru yababwiye ko ibibazo afite ahanini ari bo biturukaho kuko ngo bamwe bahishira abandi byose bikamugaruka ku mutwe. Aka gahimano Kagame avuga ko bamukorera kakaba koko gahari kuko urebye ibyemezo byinshi bifatwa usanga bisa n’ibigamije kwihutisha irangira ry’ubutegetsi bwa FPR nyamara na we yiyibagiza ko hari ibyo na we afata ahubutse bikongera amakosa akorwa n’abamwungirije cyane cyane ko bo bankurikira butama aka ba bidishyi.

Hirya y’iyi nama kandi hanavugwa indi nama y’abasirikari yakozwe n’abo mu rwego rw’aba generals atari Kagame uyiyoboye kuko we yari hanze y’igihugu ikaba ngo yari igamije kwisuzuma ngo barebe aho bageze. Icyavugiwe muri iyo nama ngo ni ukureba uko mu gisirikari byifashe maze bose bakibaza amaherezo y’ibibazo biri mu gisirikari cyane cyane ifungwa rya hato na hato ry’abasirikari bo mu rwego rw’aba generals bavuga ko bikabije kandi ko bidakwiye gukomeza bityo. Ibi ngo byarakaje Kagame ku buryo n’abibeshya ko ngo abasirikari bane ba officers bavuze ko barekuwe atari byo ahubwo barushijeho gukanyagwa. Urugero muzarebe ikinyamakuru rushyashya yo muri kino cyumweru ahavugwa general Gumisiriza mu mazi abira.

Ikindi gikomeye cyane kuruta ibindi byose ni umwiteguro wo kurangiza ubutegetsi bwa Paul Kagame uru mu byegera bye. Amakuru yizewe cyane aremeza ko hari umugambi uri bugufi cyane wo guhirika ubutegetsi bwa Kagame ariko ngo bikazakoranwa ubuhanga buhanitse ku buryo hatakongera kumeneka amaraso mu gihugu. Aya makuru aturuka ahantu kure ku buryo abayasoma bakwiye kuba maso kandi ntibakuke imitima kuko abayatanga bemeza ko ibi bizakoranwa ubuhanga bwo mu rwego rwo hejuru ku buryo nta buzima bw’umunyarwanda buzahahungabanira. Ngaho intore nimuhaguruke mwitukire nduzi ko ari nta kindi mwamenyerejwe cyakora igihe nikigera muzagire n’ubutwari bwo gusaba imbabazi kuko kuntuka ntacyo bingabanuraho ntibinambuza kubaburira ngo ejo mutazagwa mu mutego nk’uwo interahamwe zaguyemo. AGAPFA KABURIWE NI IMPONGO.

Juvénal Majyambere

Kigali

Gen Ntaganda yaba ashaka guhungira mu Rwanda!

Gen Ntaganda yaba ashaka guhungira mu Rwanda! timthumb

Gen Bosco Ntaganda ushakishwa na Leta ya Congo, ashobora kuba ashaka guhungira mu Rwanda, ibyo byemejwe n’umwe mu basirikare bigometse kuri uyu wa 7 Gicurasi 2012. Ingabo za Congo zasubiranye ku uyu wa gatanu tariki ya 4 Gicurasi 2012 agace ka Mushaki muri Masisi hafi y’ahari ikiraro cy’inka za Gen Bosco Ntaganda aho yavugaga ko ari kuri uyu wa kabili tariki ya 1 Gicurasi 2012 nyuma yo guhunga urugo rwe rw’i Goma.

Nyuma y’amakuru yavugaga ko agoswe, uwahoze ari umugaba mukuru w’ingabo za CNDP, byavugwaga ko yarimo kuva mu karere ka Mushaki ashaka guca muri Pariki ya Virunga kugira ngo agere ahitwa Runyonyi muri Rutshuru ahegereye umupaka w’u Rwanda na Uganda ahasange Col Makenga wari umwungirije muri CNDP, bivugwa ko ari indiri y’ishyaka CNDP kuva kera, umwe mu basirikare bigometse aratangaza ko abo basirikare bigometse barimo gusubira inyuma ku bushake bwabo kandi bizeye ingufu zabo.

Ku bijyanye na Gen Ntaganda, uwo musirikare wigometse utashatse ko amazina ye atangazwa, yavuze ko basanze ari byiza ko Gen Ntaganda ahungira ahantu hizewe, nko mu Rwanda, aho ashobora gukurikiranira ibintu hafi.

Yakomeje kandi avuga nta gahunda bafite yo guteza intambara, ariko Leta ya Congo ngo nibazanaho intambara bazayirwana. Ntabwo yashatse kugira byinshi avuga kuri iki kibazo ndetse yanze no gusubiza ikibazo kijyanye n’uko abasirikare batorotse igisirikare bashobora kwinjira mu Rwanda uko bashatse.

Hari andi makuru avuga ko ingabo za Congo zahagaritse ibikorwa byazo byo guhangana n’abasirikare bivumbuye mu ijoro ryo ku ya 4 rishyira iya 5 Gicurasi 2012, zikemeza ko zagaruye umutekano nk’uko byemejwe na Lt Gen Didier Etumba Longila, umugaba mukuru w’ingabo za Congo.

Lt Gen Etumba kandi yahamagariye abo basirikare bigometse gusubira mu murongo bitarenze iminsi 5, agasaba abakuru b’imitwe y’ingabo gushyiraho uburyo bworohereza abasirikare bashaka kugaruka mu murongo kugaruka. Ariko ntabwo yatangaje niba abo basirikare bazahanwa cyangwa ntibahanwe.

Aya makuru asohotse mu gihe mu cyumweru gishize urubuga rubogamiye kuri Leta ya Kigali, igihe.com rutangaje ko i Kigali hari habereye inama hagati y’abakuru b’iperereza mu gisirikare cya Congo, n’abakuru b’ingabo n’iperereza b’u Rwanda. Ibyavugiwe muri uwo mubonano ntabwo byatangajwe, ariko bishoboke ko higwaga uburyo hakwikizwa Gen Ntaganda kuko bigaragara ko abangamiye ibihugu byombi kandi na none kumushyikiriza urukiko Mpanabyaha Mpuzamahanga bikaba byashyira hanze amabanga menshi byaba ku ruhande rwa Congo ndetse cyane cyane no ku ruhande rw’u Rwanda.

Uko bigaragara iryo hagarikwa ry’imirwano ryatangajwe igihe abasirikare ba Congo bashinzwe iperereza bari barangije ibiganiro n’abo mu Rwanda, byumvikane ko hashobora kuba hari imishyikirano hagati y’impande zombi zihanganye mu burasirazuba bwa Congo hakoreshejwe ubuhuza bw’u Rwanda dore ko bivugwa ko Gen Ntaganda ari igikoresho cy’u Rwanda.

Kuba Gen Ntaganda yahungira mu Rwanda ntabwo twavuga ko ari ikintu kidashoboka ariko na none u Rwanda ntabwo byaruha isura nziza dore ko u Rwanda rukomeje kuvuga ko ikibazo cya Gen Ntaganda ari ikibazo hagati y’abanyekongo ubwabo.

Marc Matabaro

Rwiza News

ISHYAKA PDP-IMANZI RIRATABARIZA UMUYOBOZI WARYO BWANA DEOGRATIAS MUSHAYIDI.

ISHYAKA PDP-IMANZI RIRATABARIZA UMUYOBOZI WARYO BWANA DEOGRATIAS MUSHAYIDI. 180662_129802850423610_100001816876740_179310_2102642_n-277x300Ishyaka PDP-IMANZI riramagana ryivuye inyuma ibikorwa by’iyicarubozo n’itotezwa rikabije ubutegetsi bwa Leta y’u Rwanda buyobowe n’ishyaka FRP-INKOTANYI bukomeje gukorera umuyobozi waryo Bwana Déogratias MUSHAYIDI muri gereza ya Mpanga aho yimuriwe kuva ku itariki ya 26 Mata 2012.

Ishyaka PDP-IMANZI riramenyesha Abanyarwanda bose, abanyamahanga cyane cyane inshuti z’ishyaka PDP-IMANZI n’iza Bwana Déogratias MUSHAYIDI by’umwihariko ko kuva yakwimurirwa muri gereza ya Mpanga, afungiye mu kato kandi afashwe nabi cyane. Ubuzima bwe n’amagara ye birabangamiwe cyane kuko nta muntu n’umwe wemerewe kumusura. Ababigerageje barimo n’umwunganira mu mategeko, bose ubuyobozi bwa gereza ya Mpanga bwabangiye kumubona.

Ku itariki ya 26 mata 2012, amashyaka PDP-IMANZI na PS-IMBERAKURI yasohoye itangazo ritabariza abayobozi bayo aribo Bwana Déogratias MUSHAYIDI na Maître Bernard NTAGANDA ubwo amakuru yaturukaga muri gereza nkuru ya Kigali izwi ku izina rya 1930 yavugaga ko abo bayobozi bari gutotezwa no gukubitwa n’ubuyobozi bukuru bwa gereza bufatanyije n’inzego za gisirikare zishinzwe iperereza : CID na DMI.

Nyuma y’iri tangazo, umuyobozi wa gereza mu Rwanda Bwana Pawulo RWARAKABIJE yatangaje kuri radiyo BBC Gahuzamiryango ko Bwana Déogratias MUSHAYIDI yimuriwe muri gereza ya Mpanda muri gahunda yo kumwegereza abavandimwe be, naho Maître Bernard NTAGANDA akarekerwa muri 1930.

Ishyaka PDP-IMANZI ryongeye kwamagana iyi mvugo yuzuye agashinyaguro, ubugome n’agasuzuguro ya Bwana Pawulo RWARAKABIJE. Ntawe uyobewe ko Bwana Déogratias MUSHAYIDI nta muvandimwe n’umwe akigira mu Rwanda. Ababyeyi be kimwe n’abavandimwe be bose bazize ubwicanyi bunyuranye bwabaye mu Rwanda, bamwe bicwa mu mvururu zo mu 1961 abandi muri jenoside yo mu 1994. Ikindi, nubwo nta muvandimwe yahasigaranye, Bwana Déogratias MUSHAYIDI akomoka i Kibungo, kumukura i Kigali ukamujyana i Mpanga nta nubwo ari ukumwegereza aho akomoka. Imvugo ya Bwana Pawulo RWARAKABIJE ko bamwegereje abavandimwe be nta kindi ihatse uretse agashinyaguro no kurushaho gutera intimba Bwana Déogratias MUSHAYIDI n’inshuti ze.

Ishyaka PDP-IMANZI rirasaba imiryango irengera ikiremwamuntu n’imiryango itabara imbabare nka Croix-Rouge gutabara Bwana Déogratias MUSHAYIDI hakiri kare.

Ishyaka PDP-Imanzi riributsa ubutegetsi bwa Leta y’u Rwanda iyobowe n’ishyaka FRP-INKOTANYI ko ubuzima bw’umuyobozi waryo Bwana Déogratias MUSHAYIDI, kimwe n’ubw’abandi banyapolitike bafungiye akamama, buri mu maboko yabwo ko kandi icyo bazaba cyose buzakibazwa.

Ishyaka PDP-IMANZI rirasaba Abanyarwanda bose guhaguruka bakamagana iyi mikorere ya kinyamaswa ubutegetsi bwa Leta y’u Rwanda buyobowe n’ishyaka FRP-INKOTANYI bwagize umuco.

Bikorewe i Nederweert /Hollande ku itariki ya 07 Gicurasi 2012.
Gerard KARANGWA SEMUSHI (Sé)
Visi-Perezida w’Ishyaka PDP-IMANZI

Ngarambe wo mu Runana afungiwe muri Gereza ya Kimironko azira gukoresha sheki y’impimbano.

Ngarambe wo mu Runana afungiwe muri Gereza ya Kimironko azira gukoresha sheki y'impimbano. urananaRugwiza Eugene uzwi mu ikinamico Urunana ku izina rya Ngarambe, afungiwe muri Gereza ya Kimironko aho akurikiranweho gukoresha impapuro mpimbano.

Aganira n’umunyamakuru Henri Jado Uwihanganye wo mu kiganiro Ten Super Star gica kuri Radio 10, Umuvugizi w’Ubushinjacyaha mu Rwanda, Alain Mukurarinda yemeje aya makuru aho yasobanuye ko uyu mugabo akurikiranweho icyaha cyo gukoresha sheki y’impimbano.Alain Mukurarinda yagize ati: “Ayo makuru niyo, afunzwe kubera inyandiko mpimbano zirebana n’amasheki baba biganye bakajya gufata amafaranga ku makonti atari ayabo.

Yaciye imbere y’inama y’abacamanza bamufunga by’agateganyo iminsi 30.”Muri iyi minsi 30 haracyakorwa iperereza kuri iki cyaha Ngarambe akurikiranweho nkuko Alain Mukurarinda yakomeje abivuga. Ati: “Iyo minsi 30 hari gukorwa iperereza, nirangira ubushinjacyaha buzohereza dosiye mu rukiko kugira ngo izaburane mu mizi. Iyo iminsi 30 irangiye iperereza ritararangira basaba kongera icyo gihe cy’iminsi 30. »

Abajijwe Banki Ngarambe yaba yarajyanyemo iyo sheki y’impimbano, Alain Mukurarinda yavuze ko bidashoboka kuhavuga dore ko iperereza rigikomeje. Ati : « Iperereza ni ibanga amakuru naguha ni uko akekwaho gukoresha amasheki y’amahimbano. Ibindi byaba ari ukunyuranya n’amategeko.»

Source:Munyengabe Murungi Sabin, inyarwanda news

Hollande yatsinze amatora: N’izihe ngaruka ku Rwanda?

Hollande yatsinze amatora: N’izihe ngaruka ku Rwanda? Francois-Hollande-elu-president-de-la-republique_img_664_399-262x300

Président Francois Hollande

Icyiciro cya kabiri cy’amatora ya Perezida wa Repubulika mu Bufaransa cyakurikiraniwe hafi ubutegetsi bw’i Kigali cyirangiye habaye intsinzi y’Umukandida w’umusosiyaliste François Hollande. Iyi ntsinzi ishobora gutuma umubano w’u Rwanda n’u Bufaransa wongera gusubukurwa dore ko warimo igitotsi.

Ubu ubutwererane bw’u Rwanda n’u Bufaransa busa nk’uburimo ibitotsi, nyuma y’aho u Rwanda rwanze Hélène Le Gal wari ugiye gusimbura Laurent Contini bivugwa ko yari afite imigenderanire myiza na Leta y’i Kigali.

Ubu Ambassade y’u Bufaransa iracungwa by’agateganyo na Chargée d’affaires. Imishyikirano hagati ya kompanyi Rwandair na Airbus mu gushaka kugura indege 2, umushinga w’isanwa ry’Inzu ndangamuco y’u Rwanda n’u Bufaransa i Kigali n’ishoramari ryari riteganijwe mu kuvoma Gaz Méthane mu kiyaga cya Kivu byose byarahagaritswe.

Nk’uko bivugwa n’ikinyamakuru Jeune Afrique, umwe mu bakorana na Perezida Kagame yatangaje ko: ”niba Sarkozy atsinze amatora, Alain Juppé akaba Ministre w’Intebe cyangwa w’Ububanyi n’Amahanga nta kizahinduka. Ariko Hollande natsinda byose birashoboka.”

Ubu ibintu byose birashoboka kubera ushinzwe akarere k’ibiyaga bigari cyane cyane u Rwanda ku ruhande rw’abashinzwe Afurika mu bakorana na Président Hollande, uwo ni Mme Christiane Taubira umudepite w’ishyaka PRG (Parti Radical de Gauche) wa Guyane.

Uyu mudamu ari mu kanama kitwa groupe d’amitié France-Rwanda kayobowe na Mme Marylise Lebranchu mu Nteko Nshingamateka y’u Bufaransa.

Mu 2005, abagize ako kanama bagiye mu Rwanda mu butumwa bw’abashingamateka, babonana na Ministre w’Ububanyi n’amahanga w’u Rwanda, bagenzi babo b’abadepite n’abasenateri ndetse n’abapfakazi ba Genocide.

taubira_gauchiste

Madame Christiane Taubira

Mu 2009, uyu mudamu yatanze ubuhamya ashyigikiye SOS Racisme mu rubanza uwo muryango urwanya ivanguramoko waburangaga n’umwanditsi Pierre Péan, maze avuga uko abona impapuro 4 zatangajwe mu gitabo Noires fureurs, blancs menteurs.

Mme Taubira yasobanuye izo mpapuro 4 agira ati ”zuzuyemo propaganda, zerekana ubwirasi bw’abahakana Genocide cyangwa bashaka kwerekana ko yari ngombwa. Amagambo yakanguriye abantu kwica mu Rwanda, amagambo ni nayo yababariye agatanga imbabazi.”

Uyu mudamu w’umwirabura ukomoka muri Guyane yari yanashyigikiye ko hakoherezwa ingabo za ONU zashoboraga guhagarika Genocide mu kwiyamamariza amatora y’abadepite bo mu nteko nshingamateka y’ibihugu by’u Burayi mu 1994. Leta y’i Kigali imubona nk’inshuti.

Ariko hari ibibazo bikomeye byibazwa:Ese uyu mudamu azakomeza kuba wa mudamu wihagazeho utavugirwamo mu kibazo kitoroshye nk’icy’u Rwanda? Ese azagumana kutava kw’izima n’ubwigenge bwe byatumye yubahwa na bose ku bijyanye n’uburenganzira bw’ikiremwamuntu, gufungura urubuga rwa politiki mu Rwanda, n’uruhare rw’itangazamakuru na société Civile mu mitegekere y’igihugu?

Ikizwi n’uko ari ngombwa kongera gushyira ingufu mu mubano w’u Rwanda n’u Bufaransa ariko ntabwo bishaka kuvuga ko Ubutegetsi bw’i Kigali aribwo bugomba kugena ibigomba kugenderwaho.

Inzira igana ku gusubukura umubano hagati y’u Rwanda n’u Bufaransa irimo inzitizi nyinshi Mme Taubira akazi ke gashobora kutazamworohera.

Marc Matabaro
Rwiza News

Source:Jambonews

1...45678

archivesallahalwatanalmalik |
pk2012legislatives |
rectificador |
Unblog.fr | Créer un blog | Annuaire | Signaler un abus | thevoiceofpresidentielles
| legislative2012
| cournonpartisocialiste