RDI-Rwanda Rwiza ya Faustin Twagiramungu igiye gukorera politiki mu Rwanda!

 

RDI-Rwanda Rwiza ya Faustin Twagiramungu igiye gukorera politiki mu Rwanda! image001-279x300ITANGAZO RY’ISHYAKA RDI-RWANDA RWIZA

Inama y’ubuyobozi bw’ishyaka RDI yateranye kuwa 27 Gicurasi 2012, ifata imyanzuro ikurikira.

1. Ishyaka RDI rirashimira abarwanashyaka baryo bamaze iminsi batanga ibitekerezo ku mbuga za Interneti, hagamijwe kumvikanisha imiterere y’ibibazo byugarije u Rwanda, bishingiye ahanini ku butegetsi bw’igitugu bwa Prezida Kagame na FPR, bukomeje kwica urubozo abaturage, bubavutsa uburenganzira bwabo bw’ibanze.

2. Ishyaka RDI rishyigikiye ko abiyemeje gukora politiki bakwimakaza umuco mwiza wa demokrasi wo kujya impaka zuzuzanya cyangwa zivuguruzanya (débat contradictoire), kugira ngo abanyarwanda barusheho gusobanukirwa amatwara n’imigambi by’abagambiriye kubayobora. Si ngombwa ko abantu bose babona ibintu kimwe, kandi ntibikwiye gutuka, gusebya cyangwa gufata nk’umwanzi uwo mudahuje igitekerezo.

3. Ishyaka RDI, rimaze gusuzuma inzira zose zishoboka zo gukemura mu maguru mashya ikibazo cy’ubutegetsi bw’igitugu bukomeje kuzambya u Rwanda, ryashimangiye icyemezo cyo kujya gukorera politiki mu gihugu imbere, rifata n’izindi ngamba zihamye zageza Abanyarwanda ku mpinduramitegekere mu gihe kitarambiranye.

4. Ishyaka RDI rirarikiye abanyarwanda aho bari hose, kuzisuganya uko bashoboye tariki ya 1 Nyakanga 2012, kugira ngo bizihize ku mugaragaro isabukuru y’imyaka 50 y’ubwigenge bw’igihugu cyacu. RDI iragaya kandi Leta ya Kagame kuba nta birori yateganyije kuri iyo tariki : kuba FPR irutisha intsinzi ya bamwe ukwigobotora ingoma ya gihake na gikolonize kw’imbaga y’Abanyarwanda, ni ibyo kwamaganira kure, dore ko bigamije gusibanganya burundu amateka y’ingenzi y’igihugu cyacu, ashingiye kuri revolisiyo ya rubanda yo mu mwaka w’1959.

Bikorewe i Sion (Suisse), kuwa 28.05.2012

Mw’izina ry’Ishyaka RDI-Rwanda Rwiza,

Jean-Marie Mbonimpa

Umunyamabanga mukuru (Sé)

 


14 commentaires

  1. Gatwa Pontien dit :

    Ngo mutegereje Rukokoma aze i Rwanda?Uzi yaravuganye iki na Ambasaderi Uwibaijje uri gutumira inama ngo avuge ibyo avanye i Rwanda?Jye mbabwije ukuri ko Rukokos atazahonyoza ikirenge cye i Rwanda mbere y’iyi taliki y’ubwigenge.Yabikoze Kagame akamuhonyora se?Urabona le 4/7 ishobora gukurwaho ngo ni uko Uwisubije na Rukukos baje i Rwanda?Jye ndatega nawe:Rukokos n’abambari be nibaza i Rwanda mbere y’iriya taliki bavuga ngo tuzibuke ubwigenge,uzaze nguhe mutziig n’inkoko.Ahubwo ahaye imbaraga abandi bagize opposition basigaye kuko bazamukwena babonereho kumubwira ko ashaje cyangwa ko agomba kureka politike yo mu kirere.Ahubwo mbariza Padiri Thomas niba nawe ari gufunga amavalisi,sha nzaba uwambere kujya kumwakira dore tunaturanye i Nzahaha-Bugarama.

  2. Bosco dit :

    Reka mbabwire urwenya:Igihe uburetwa bw’abaroma bwari bumereye nabi abantu b’igihe cya Yesu bifuje ko yafatanya nabo kubarwanya ariko basanga ibyo atekereza bihabanye n’ibyo kuko atari uw’isi. Dore imiburo imwe yahaye abo barakare:

    - Ugutegeka naguhatira gukorana nawe ikirometero uzemere gukorana nawe bibiri
    - Ku bijyanye n’uko bagombaga gusorera abo bakoloni; yaravuze ati kayizari mumuhe ibye Imana ibyayo.
    Mwenedata usomye ibi fata umwanzuro: Ese uwaguha iby’isi byose akaguheza ku migisha y’ingoma y’ijuru byakumarira iki? Kuba ukoresha internet urajijutse nta shiti! Ariko se kuba utukana bene ako kageni urumva bikubereye cyangwa ku munsi w’urubanza wumva ufite igisobanuro cy’aho ukomora uwo mujinya? Ese wakwemera kwiga Bibiliya nta kiguzi ugahinduka umuhamya wa Yehova aho kubaho uhanganye n’ibiremwa by’Imana yiremeye itakubajije? Niba wumva washimishijwe nyandikira kuri hakizabosc@yahoo.fr uve ibuzimu ujye ibuntu, ureke kwibaza ibyo udafitiye igisubizo urushaho gucumura ku Uwiteka gusa.

  3. ppr dit :

    JEAN we urakoze kubwira iriya nterahamwe RUKATAZA. Ntibazongera kudutobera igihugu ngo tubemerera. Indwara bafite ni uko ubu umututsi yabonye agaciro, kuri bo ni uburwayi bukomeye. Rukokoma natahe, azane ibikorwa, ibigambo twarabihaze. Ntadutobere kandi ubumwe bw’abanyarwanda, azana aby’amazuru n’ibya rubanda nyamwinshi. Ubu kuyobora u Rwanda = IBIKORWA, UBUMWE, ITERAMBERE (barebe DR HABUMUREMYI), nibatamurusha, tuzabahenera.

  4. jean dit :

    niko LUCIANA we! nyemerera tuganire gato! mbaje kugusuhuza mbere ya byose ariko.
    reka mbanze ngire icyo nkubwira kuri independance day. iriya tariki ya 1 Nyakanga ntaho ihuriye na 59. iriya taliki ni iyo muri 61. muri 59 abatutsi barishwe abandi barahunga ibyo ntawabihakana, ntago rero iriya taliki yagiyeho ngo yizihize uwo munsi ayo mahano yabereyeho, ahubwo yagiyeho ngo yizihize umunsi Leta y’ububiligi yemeraga kurekura ubutegetsi ikabuha abanyarwanda ( ikibazo ni uko itabuhaye abanyarwanda bose, yabuhaye abahutu gusa kubera ya turufu ababiligi barisha ya « diviser pour regner » ), yabuduhereye rimwe n’ uburundi ibuduha kdi nyuma y’umwaka ibuhaye Congo( 30 juin 1960). muri Africa yose yewe ndetse no muri America umunsi w’ubwingenge ibihugu byose birawizihiza kuko ari umunsi twibukiraho igihe ubutegetsi bwavaga ku mugaragaro mu maboko y’abazungu ( uretse ko na nubu abo bavunamuheto b’abazungu bakibufite mw’ibanga. mbese baracyatuyobora kdi baracyadutegeka. ibi ninabyo HE Paul Kagame yirirwa atubwira ko tugomba kwihesha agaciro ntidukomeze guhakwa n’aba bavunamuheto). mu Burundi ubu imyiteguro igeze kure yo kwizihiza uwo munsi kuko imyaka 50 izaba ishize, uribuka umwaka ushize ko na RDC yawijihije na prezida wacu akajyayo. ni ngombwa rero ko natwe uyu munsi twawugira.
    Uravuga uti 4 Nyakanga 1994 niwo munsi ufite agaciro kuko aribwo FPR yafataga Kigali. yego nawo ufite agaciro, ariko nubwo wavuze ngo 1 Nyakanga kuri independance day hahunze benshi abandi barapfa, sibyo. ahubwo iya 4 Nyakanga 94 benshi bari bagihunga. miliyoni ebyiri z’abanyarwanda zari zirimo guhunga. i ya 4 Nyakanga ni umunsi genocide yakorerwaga abatutsi yahagarikiweho, ni umunsi rero ujyanye kdi usoza icyunamo cy’iminsi 100 dukora buri mwaka, ni umunsi tugomba kwishima kuko ayo marorerwa aribwo yahagaritswe, ariko si umunsi w’igihugu! ntago ariwo munsi u Rwanda rwitiwe Repubulika! iya 1 Nyakanga 61 rero ni umunsi u Rwanda rwemewe mu ruhando rw’ibindi bihugu, maze rukigenga. niyo mpamvu tugomba kuwizihiza.
    Wanavuze uti iterambere rirahari mu Rwanda, Kigali irubatswe, abana bariga ntavangura. ibi nibyo rwose! ariko na mbere y’intambara iterambere ryari rihari! impamvu rero tutabyemera ni uko tuvuga tuti Kagame yaduhaye computer, aduha internet, aduha amashanyarazi, aduha byinshi cyane ntanarondora. nonese mwagirango internet ive he itaravumburwa, computer ive he itarasakazwa ku masoko! uko u Rwanda rwari rumeze muri 61 cg muri kangahe, ntago ariko 94 yageze rugeze Kagame yakomerejeho, ariko ntiyatangiye bundi bushya. ntago nazinduwe no kurata ibyiza Habyarimana yagezeho ariko tutigize nkana birahari kdi ni byinshi cyane. twibuke kdi ko politique yo ku bwa Habyarimana yari itandukanye ni iy’ubu. mbere na mbere yo yashakaga kugeza amajyambere mu cyaro kurusha kubaka umugi wa Kigali. mu gihe ubu ikihutirwa ari Kigali. ngaho nawe reba indi migi urebe uko yari imeze 94 uyigereranye n’ubu. usibye wenda amazu atarenze icumi yubatswemo hari ikindi cyakozwe. njye ntuye mu mujyi wa Ruhango, ariko ndakubwiza ukuri ko uko uyu mujyi wari umeze 94 ari nako ukimeze ubu! nta muhanda mushya, nta soko rishya, yewe na gare ni yayindi byose byubatswe mbere ya 94!
    uti ku ngoma ya Habyarimana hariho quota! ni ukuvuga hari umubare runaka w’abatutsi utaragombaga kurenzwa mu bikorwa byose bya Leta, ntago ari mu mashuri gusa ahubwo ni muri service zose! nta n’ubwo byari 30% ahubwo byari 15% !! mu bintu dushimira ubutegetsi bw’ubu ibi nabyo biza mu bya mbere ubu bose bariga. ariko dusesenguye neza dusanga quota ihari, ariko mu bundi buryo! nta nubwo ndetse nayita quota sinzi icyo nayita! amashuru twese turiga tukarangiza na za université ariko nyuma yaho? utekerezako utari muri FPR wagira icyo ugeraho? niba uri umucuruzi, umusoro wa FPR uracyenewe kugirango utere imbere, niba atari ibyo uzasigara ucuruza umunyu n’ibibiriti gusa. Jya gusaba akazi ahantu se! udafite ukwinjirira ibukuru cg utaravuye Uganda wazakabona? quota ubu ihari ni soit uri muri FPR uratera imbere cg se ntuyirimo ntacyo uzageraho, ntago bikiri hutu-tutsi cg kiga-nduga nka mbere.
    reka ndangize mvuga kuri uyu musaza Twagiramungu, njye uyu mugabo ndamwumva kdi ndamwubaha. muri 92 mu nkumbiri y’amashyaka Twagiramungu niwe wari uri imbere yamagana Habyarimana kubera politique ye mbi yaririho. ashaka rukokoma ( ibiganiro mpaka), ashaka ko amashyaka yaba menshi , hakabaho democratie. kubera we n’abandi bafatanyaga twari tugiye kubigeraho, intambara iba irateye. nyuma y’intambara muri gouvernement ya FPR ntiyihanganiye ubwicanyi bwakorwaga hirya hino mu gihugu kdi bwagaragaraga ko FRP iburi inyuma. akajya ku ma radio akabyamagana we na MDR ye ariko RPF ikicecekera. abonye ko bidashoboka ahubwo ko nawe ashobora kubigwamo yifatira inzira arahunga. none ubu agiye kugaruka ya mashyaka ngo ari muri opposition itanemewe ikorera hanze kuri internet, arimo kumwagana ngo arabagambaniye!! why? kuko yanze kuvuga rumwe na RNC ya Kayumba na Rudasingwa se? kuko ahisemo gutaha se? nonese muri twe hari uyobewe ko politique yo kuri internet niyo mwateka ibuye rigashya ntaho yazagera? icyo nzicyo n’uko atagiye kwisubiramo nka Rwigema! yewe nta n’igihamya koko ko yaba yaraguzwe na Kagame gihari! ni amagambo gusa! reka dutegereze turebe niba koko azanashyira akagenda kuko nabyo ntawamenya, namara kugera ibikorwa n’amagambo azakora nibyo bizatwereka icyo agiye kumarayo koko. anho ubundi kuvuga gusa, nibyo bituma opposition yanyu itanatera imbere ahubwo igazamo ibice. erega amabwire arasenya ntiyubaka. naho iki kibazo cya Twagiramungu kinyeretse ko koko nta muhanuzi wemerwa iwabo. nonese ubundi abo bari muri opposition bari kumupinga babaye aribo bajya mu Rwanda ahubwo bakareka kwirirwa bata umwanya kuri internet?
    Murakoze
    John

  5. ppr dit :

    Luciana we reka ibyiriya nterahamwe Rukataza! Kuri we kuba nta ringaniza rikiriho nibwo burwayi bafite. Kagame se azajya he? Azavanwaho nande? akoresheje iki?Nimukomeze mute ibitabapfu. Ibivume byose niko byitwara. Imana yarabavumye, muzapfa mwangara, mukorera politiki kuri internet. Puuuuuu!!!!!

  6. Luciana dit :

    Ndibaliza Rukataza: ngo ntabwo Président Kagame azaba ali ku butegetsi? Abuzwa n’iki se? Nawe se? Aliko kuki mutemera gutegekwa neza? Uretse ibyo mwilirwa muvuga, hali undi mutegetsi mu ngoma ibihumbi n’ibindi mwali mwabona wateje imbere u Rwanda n’abanyarwanda bingana kuliya? Mwibagiwe ukuntu Habyara yilirwaga avuga ngo u Rwanda ni ruto nibagume iyo bali? Wasaba ishuli uli umwana w’umututsi ngo 30% haruzuye. None ubu umuntu wese arajya mu Rwanda akishyira akizana, agasubira iyo aba haba i Bulayi cyangwa muli Africa nta nkomyi,umwana wese arajya mw’ishuli akiga, ndetse na se na nyina batize kubwa Habyara na Kayibanda bemerewe kwiga bashaje, mwarangiza ngo ntazaba akiliho? Uli Immana se yamuremye ko aliyo izi umunsi we n’italiki? Aliko ntimugahore mushaka ibicika, ngo ahali amahoro muhahindure mu muliro. Jya mu Rwanda urebe, uzizihirwa, wicwe n’ubwuzu, nurangiza wicuze ibyo wavuze. Ese Kagame uba uvuga, uramuzi neza?
    Ese dusubire kuli iliya révolution ya 59, yamennye amaraso angana iki y’Abatutsi? Abo se si Abanyarwanda? Icyo nicyo wowe na Rukokoma mushaka kwizihiza se? Itsinzi ko yagobotoye u Rwanda ikaruvana muli génocide se, 59 ikica igatera ubuhunzi mu gihugu, urumva ko bikwiye kugereranywa? Tujye dutekereza kandi dushishoze. Jye sindi umunya politique cyangwa se umu raciste na gahoro, aliko ndi umunyarwanda wabonye izo ngoma zose. Nta yiruta iya Kagame. Ahubwo nimuze tumufashe kwubaka igihugu cyacu, niba hali ibitameze neza tumufashe kubigorora, tumuhe ibisubizo. Ntabwo biliya uvuga ali ibisubizo. Ugire umunsi mwiza.

  7. Rukundo dit :

    Mureke Rukokoma atahe nuburenganzira bwe kandi niyo Demokarasi!Kandi rero icyo mwita opposition ya nyayo jye sincyumva! Abagize RNC nibo bari cerveau ya FPR!Cela veut dire que RNC ari FPR ivuguruye!Uruhare Gahima se yagize mugushyiraho amategeko Ubu Kagame akoresha mu kurenganya abanyarwanda akakanya mu rarwibagiwe!Muri make rero abatumye Twagiramungu na Rwigema bahunga ubu bari hanze y’igihugu!Ntampamvu rero nimwe yatuma Rukokoma atisubirira mu Rwamubyaye!Naho kuvuga ngo aje guharanira Demokarasi byo mubyibagirwe! kuko Rwigema na Rukokoma icyo bahuriraho nuko bose baharanira inda zabo!Turabazi rero!

  8. KABEGO dit :

    Tous ces vieux pourritures….NKIKO, Rwigema P.C.; TWAGIRAMUNGU, RUCAGU, RWARAKABIJE…… nitugira amahirwe Gaciro azabikoma Akandoya. Dukeneye amaraso ashyushye.

  9. patric dit :

    sha naze, turebe ko azongera kuvuga ngo aba kiri bato arabakanguriye gukora nkibyo muri tuniziya ,yatutse president wacu naze abibazwe ,kwangisha ubutegetsi abaturage karibu turabategereje ,ariko uwo musaza nakomeza kuvuga ibyo bigambo bye ni muri 1930 ubwose ntazahita afirayo ra

  10. gatwa dit :

    Bavandimwe Banyarwanda bene wacu,ndagirango iki cyemezo cy’ishyaka RDi ahubwo mubanze mutegereze murebe niba gishyirwa mubikorwa,ikindi mutegereze turebe niba arubuhoro.
    kuko gifashwe mugihe hari hamaze iminsi guhangana Mubinyamakuru,gusebanya,ndetse no guharabikana.Umuntu akaba atabura kwibaza izi mpurirane icyo zihatse.

    Gatwa

  11. Salaminanga dit :

    TWAGIRAMUNGU YONGEYE KUGAMBANIRA OPPOSITION

    Ndahamya ko mubasomye iri tangazo rya RDI harabahise bavumbura imitwe ya TWAGIRAMUNGU. Ntakindi kujyanye Rukokoma mu Rwanda ubu uretse kujya guha umurindi Kagame na FPR ye nkuko yabikoze kuva FPR yatangiza intambara. Agiye kugambanira opposition politique nyayo, kugira ngo intwari zirwanya kiriya gitugu cyane INGABIRE Victoire hamwe na ba NTAGANDA, MUSHYAYIDI ngo bibagiranwe burundu kuko atazigera narimwe abavugira. Ububi bwa RUKOKOMA nimigambi ye mibishya aho bigaragarira cyane nukuntu yakoresheje ariya majyogi yo muri FDU, akabagira inama yo gukorera coup d’état umukuru wiryo shyaka INGABIRE, kugira ngo barishimute maze bamuherekeze i Kigali kujya gukorera KAGAME kumugaragaro, kuko kugezubu babikoraga bwihishwa, nubwo bwose nabyo byari bizwi na benshi. Ngabo rero ba RUSAHURIRAMUNDURU barahafashe. Arikose uretse ko nubundi akabayicwende katoga ntikanashire umunuko, RUKOKOMA abona ko aherekejwe na NDAHAYO nabo ba MBERABAHIZI,byaba bivugako ari FDU ajyanye nayo ? Ntabwose aziko FDU imaze imyaka irenga ibiri mu Rwanda, ko ihakorera, ko ifiteyo ubuyobozi. Ntabwo rero byari ngombwa ko yoshya ibyo bikoresho bye ngo nibibanze kirigite biseke byibeshyera ngo nibyo bitegeka FDU (coup d’état), kuko nubusanzwe ako gaco ka ba NDAHAYO babajyana nawe bazaba bamuherekeje kugiti cyabo, mwizina ryabo gusa ! Iryo kinamico ntiryari ngombwa kuko abantu bose babahaye urwamenyo, kuberako ntacyo bashoboye kuri FDU isanzwe yifitiye inzego zemewe zigaragaza ibikorwa byinshi bya politiki mu nzego zose haba hanze cyangwase imbere mu gihugu.

    Yeeee, RUKOKOS aratashye kongera gufasha iyo nkoramaraso. Ariko yakwibagirwa vuba Nyagasani we ! Ndibuka avugira mu ruhame ati : « SINZONGERA GUHANGAANA NA KAGAME NTAFITE INGABO, YONGERAHO KO NGO IYO ABA UMUSORE ABA AGIYE MWISHYAMBA ».

    Icyakora yabewe koko bari bagiye ndetse kuruyu mugoroba, maze opposition koko ikishyira hamwe mukabona ko ibintu bidatungana ! Tuzarebe ko nibagera mu Rwanda bazasaba PILATO ko mbere ya byose agomba gufungura imfungwa za politiki, byamara gukorwa noneho akaba aribwo batangira gukina mu kibuga abo bamaze gufungurwa nabo bagaparticipa bose hamwe muriyo nkundura. Icyakora ibi nabikora, yemwe ntawe utazamushyigikira ! Ariko tuzi neza ko ataricyo kimujyane. Ni igisahiranda, agiye pour les enfoncer encore plus, uretse ko abantu bazamuhagurukira naonone ntagire icyo ageraho, nkuko ubu yirirwa avuga ngo PILATO yaramushutse !

  12. John dit :

    Oya. Naze kabisa, kugira ngo habeho guhangana kubaka.

  13. Rukataza dit :

    Iriya taliki tuzayizihiza kubera ko Kagame atazaba akiri ku butegetsi.

  14. jgap dit :

    Ariko aya mabuguma ya palemehutu ararwana niki. K ejo aho bukera ahirima!ntazi aho rda n,îsi bigeze ngo arazana aya manjwe ngo niamashyaka!

Répondre

archivesallahalwatanalmalik |
pk2012legislatives |
rectificador |
Unblog.fr | Créer un blog | Annuaire | Signaler un abus | thevoiceofpresidentielles
| legislative2012
| cournonpartisocialiste