Leta y’u Rwanda ikabije kuniga itangazamakuru

James Musoni

Muri iyi minsi dusoma amakuru ku mbuga zitanga amakuru zo mu Rwanda, ku munsi ukurikiyeho ya makuru twajya kuyareba tukayabura. Bisobanuye ko hari amategeko aba yatanzwe ngo izo nkuru zikurwe ku mbuga.

Igiteye inkeke n’uko ari inkuru ziba zijyanye n’ubuzima busanzwe bw’abanyarwanda babamo, Leta iba igamije guhisha kugira ngo ikomeze ibeshye ko ibintu byose ari byiza.

Igishekeje n’uko abatanga amategeko yo kunyonga ayo makuru baruhira ubusa kuko amakuru aba yamenyekanye ahubwo gushaka kunyonga ayo makuru ni nko kwikoza isoni ku bayobozi ku buryo bitera abaturage kwibaza byinshi.

Iyo umuntu ahereye kuri ibi ashobora kwibaza niba ibyo abayobozi batangaza byaba ku bimaze kugerwaho mu mibare n’ibindi byiza byinshi baturatira ko bagezeho biba bitarimo ibikabyo n’ibinyoma. Mu gihe amakosa yose bayatwikira ngo ntagaragare uretse ko akenshi baruhira ubusa biba nko gutwika inzu ugahisha umwotsi biranga bikagaragara.

Amwe mu mafoto ya Mukarukundo arimo guhohoterwa Leta yashatse guhisha

Natanga ingero 2 z’inkuru zamenyekanye cyane:

-Umusore witwa Sadiki Mutabazi wo muri Rubavu yaritwitse nyuma aza no kwitaba Imana ariko igitangaje n’uko inkuru y’ukwitwika kwe yabanje kugaragara ku rubuga Kigali today, mu gihe gito iyo nkuru yahise ikurwa kuri urwo rubuga ndetse icyo kibazo cya Sadiki Mutabazi ntabwo bongeye kugira icyo bongera kukivugaho. Byumvikane ko bahawe amategeko yo kubikora gutyo. N’ibindi bitangazamakuru byagize ubwoba bwo kuvuga kuri iyi nkuru kereka bimwe nka igitondo.com na impinduka.com byayitangaje nyuma y’uko iyo nkuru itangajwe na BBC Gahuza-Miryango.

-Umunyarwandakazi witwa Chantal Mukarukundo, yahaye umwana we umugiraneza ngo amumurerere kuko we atari abishoboye kubera ubukene ndetse bigaragara ko uyu mubyeyi akiri muto cyane. Icyakurikiyeho n’uko polisi y’igihugu yabyivanzemo itamuriyombi uwo wari watanze umwana ndetse acishwa mu gasantere ka Ngororero nk’igisambo cyangwa umwicanyi akubitwa atukwa n’andi mabi ntarondoye. Urubuga Igihe.com rwataye amakuru kuri icyo kibazo ndetse hafatwa n’amafoto, ariko igitangaje n’uko bitateye kabiri ya nkuru iranyongwa. Ubu ntabwo iyo nkuru ikigaragara kuri urwo rubuga ndetse n’amafoto.

Tubibutse ko itangazamakuru ndetse n’itorero ry’igihugu byose bimaze gushyirwa muri Ministère y’Ubutegetsi bw’igihugu n’imibereho myiza y’abaturage. Amakuru aturuka ahantu hatandukanye yemeza ko uyoboye iyo Ministère Bwana James Musoni ari umwe mu batoni ntanyeganyezwa b’ingoma ya Paul Kagame.
Gukomeza kumuha inshingano nyinshi se n’ukugira ngo inzego zishobore kuyoborwa neza cyangwa n’ukongerera ububasha uwo mugabo ukomeye mu gatsiko kagiye koreka u Rwanda?

Marc Matabaro
Rwiza News