Umunyamakuru Nelson Gatsimbazi yakatiwe gufungwa amezi atandatu

Umunyamakuru Nelson Gatsimbazi yakatiwe gufungwa amezi atandatu 577607_3407527740478_1038458576_3268783_721089443_n-200x300

Nelson Gatsimbazi

Nyuma yo guhamwa n’ibyaha by’ivangura no gukurura amacakubiri Urukiko rw’Ibanze rwa Nyarugenge rwahanishije igifungo cy’amezi atandatu nyir’Ikinyamakuru Umusingi Nelson Gatsimbazi.

Kuwa kabiri tariki ya 29 Ugushyingo 2011 nibwo Urukiko rw’Ibanze rwa Nyarugenge rwari rwasubitse ubugira gatatu urubanza rw’umunyamakuru w’Ikinyamakuru Umusingi Nelson Gatsimbazi wari ukurikiranyweho icyaha cyo gukurura amacakubiri. Uru rubanza rwaje gusubikurwa ku itariki ya 3 Mata 2012, maze kuwa 24 Urukiko ruhamya icyaha cy’ivangura n’amacakubiri Gatsimbazi.

Nelson Gatsimbazi utaragaragaye mu rubanza, arazira ku kuba hari ibibazo yagiranye na bamwe mu bayobozi b’ibitangazamakuru nyuma yo kugeza ikibazo kuri Perezida wa Komisiyo y’Igihugu y’amatora Prof. Chrisologue Karangwa mu mwaka w’2008, aho yabazaga impamvu hari ibinyamakuru bimwe na bimwe byahabwaga amasoko yo kwamamaza ibindi ntibiyahabwe. Akaba yaravugaga ko hari ivangura muri icyo gihe mu gutanga amatangazo yo kwamamaza mu binyamakuru byigenga. Aha Gatsimbazi akaba yaravugaga ko kwamamaza kwahabwaga abantu babaga mu Rwanda mbere ya jenoside.

Ibyo byaje gutera impaka bibyara amakimbirane ku buryo byaje kugeza aho agirana ubushyamirane n’Umuyobozi w’Ikinyamakuru Umwezi Ntarindwa Théodore, maze bombi biyambaza Polisi ; icyo gihe Umuyobozi w’Ikinyamakuru Umurinzi Gatete Jean Bosco ndetse n’Umuyobozi w’Ikinyamakuru Impamo Mwitende Jean Claude ni bamwe mu bagiye gutanga ubuhamya kuri Polisi basobanura uko ibintu byagenze.

Kuva icyo gihe mu mwaka wa 2008 kugeza muri uyu mwaka wa 2011, nta n’umwe wari warigeze ahamagarwa n’urwego urwo arirwo rwose rw’ubutabera kuri iki kibazo cya Nelson Gatsimbazi.

Ntarindwa Théodore ubwo yahaniraga na igihe umwaka ushize ubwo urubanza rwatangiraga yari yagize ati :”Nta rubanza mfite, nta n’ibyo nigeze mbwirwa, ibibazo nagiranye na Gatsimbazi si mbyibuka, nta kibazo rwose mfitanye nawe.” Yakomeje agira ati :”Ubutabera nibumpamagara nzabusobanurira, jye nta kirego nzi mfite keretse niba ari Gatsimbazi wandeze.”

Gatete Jean Bosco, Umuyobozi Mukuru w’Ikinyamakuru Umurinzi we ubwo yaganiraga na IGIHE.com, yagize ati :”Ibyo bintu birashaje, ibyo ni ibintu bya kera.” Akaba yaratangaje ko nta kirego yigeze ajyana muri Polisi cyangwa ahandi hose arega Gatsimbazi.

Mwitende Jean Claude, Umuyobozi Mukuru w’Ikinyamakuru Impamo nawe wari watumijwe n’Ubugenzacyaha ngo asobanure ku byo Gatsimbazi yaregwaga mu 2008, ubwo twaganiraga yari yadutangarije ko nta kirego yigeze atanga ndetse avuga ko nta kibazo yigeze agirana na Gatsimbazi.

Nyuma y’ikatwa ry’urubanza twashatse kumenya icyo Gastsimbazi kuri ubu utakiri mu Rwanda kuko ari mu gihugu cya Suwedi abivugaho, maze adutangariza uko yabyakiriye

Gatsimbazi yagize ati :”Icyo nabivugaho ni uko icyaha cy’ivangura n’amacakubiri cyabaye intwaro yo gucecekesha abanenga Leta bose, kuko buri munyamakuru ufunze cyangwa wahunze yagiye ashinjwa ivangura n’amacakubiri ndetse n’abanyapolitiki bose bafunze bahamwe n’ibyo byaha. Icyambere kuvuga ngo ndavangura, umuntu avangura abantu iyo hari icyo agomba kubaha bakemererwa n’amategeko. Urugero naguha ni nko kuvuga ngo nimye umuntu akazi kuko afite ubwoko runaka, cyangwa akabuzwa service runaka kubera ubwoko, muri ibyo byose nta na kimwe nigeze nkora. N’iyo bankatira burundu ntabwo bizambuza kuvuga ukuri keretse umunsi nashizemo umwuka.

Gatsimbazi kandi avugako ikibyihishe inyuma ari imyandiko yagiye asohora mu Kinyamakuru Umusingi, ago yagize ati :”Ikibyihishe inyuma nta kindi ni inyandiko zanjye nahoraga nandika nenga ubutegetsi bashaka uko banyikiza bahimba ibyo byaha.

Akomeza agira ati :”Kujurira ni nko kurega uwo uregera, gushakishwa ntacyo bimbwiye kuko ndi mu gihugu kigendera ku mategeko, kandi abenshi mu Rwanda bakoresha ubutabera nk’igikangisho nabo barashakishwa.

Nelson Gatsimbazi ni nyir’Ikinyamakuru Umusingi, kimwe mu binyamakuru byigenga bikorera mu Rwanda.

Mu mwaka wa 2010 Nelson Gatsimbazi yandikiye Komiseri Mukuru wa ndetse yoherereza na kopi Perezida Kagame ashinganisha umutekano we.

Muri uwo mwaka kandi Ikinyamakuru Umusingi cyahawe gasopo n’Inama Nkuru y’Itangazamakuru ku mpamvu z’imyandikire cyakoreshaga mu nkuru cyashyiraga ahagaragara byavugwaga ko zari zihabanye n’amahame, ndetse n’amabwiriza agenga itangazamakuru ry’umwuga, ibi bikaba byari kukiviramo guhagarikwa mu gihe byaba bidakosotse.

Source:Olivier Muhirwa, Igihe.com

 


Répondre

archivesallahalwatanalmalik |
pk2012legislatives |
rectificador |
Unblog.fr | Créer un blog | Annuaire | Signaler un abus | thevoiceofpresidentielles
| legislative2012
| cournonpartisocialiste