Sinamwibagirwa Déogratias Mushayidi

Sinamwibagirwa

ni iki cyabintera, ninde wamunyibagiza ?

kugwiza ishavu ntibyantera kwibagirwa

u Rwanda aboheyemo n’ubuhemu akorerwa

yarwanyije abahezanguni bamwe b’udufuni

mbifuture: sinamwibagirwa

 

nibutse Mushayidi ko ari intwari mu mfura

azava mu mfuruka ibyo bifura bimuhejejemo

ntibisinzira kubw’imanza roho zabyo zibicira

byicaye mu magorofa yubakiye ku mivu y’amaraso

mbisubiremo: sinamwibagirwa

 

araje vuba abahagame na Kagame bimurenge

icyo yabasabye muraje mugitange mwinginga

ingoma yanyu ndayireba hamwe harindimuka

akaga karabugarije, nyabuna ntiribarengane

mbishimangire: sinamwibagirwa

 

ko yasabye kuganira mukagotwa n’ubwoba ?

ko ubwoko yatangaje ko atari umushinga

ingoyi mwayoroheje ko icuraburindi ribarekereje

icumu niryunamurwe na Mushayidi arenganurwe

rwose: sinamwibagirwa

 

mbibutse se ko arimo urupfu atumva

imva zanyu se mwiyemeje kuzicukurira ?

mwituma tumara ibinonko mu guca amarenga

ararengana murabizi, cyo nimumuziture

reka mbyature: sinzamwibagirwa

 

Mwe mugiye gukongokana ubukotanyi

amanyanga n’uburiganya byanyu birasema

isoni mwaraneye mwikwihanaguza umuyaga

mbibayagire: sinakwibagirwa Déo

 

ararekwa ntashira, inshuti ndayikumbuye

abagabo-mbwa ngo nibo baseka imbohe

naho abahanuzi bose bazi ko bigiye gusohora

mudohore rero hatazagira ubamba igikeli

ukuli ni uko Mushayidi arengana…