IMPAMVU BWANA FAUSTIN TWAGIRAMUNGU YAGOMBYE GUSABA IMBABAZI!

IMPAMVU BWANA FAUSTIN TWAGIRAMUNGU YAGOMBYE GUSABA IMBABAZI! Faustin-Twagiramungu2-300x218

Twagiramungu Faustin

 

 

Nyuma yo kumva ikiganiro uwitwa Haguma Marcel yagiranye na Radio Ijwi rya Rubanda ndetse n’uko Bwana Faustin Twagiramungu yusubije amagambo ya Marcel Haguma avuga ko adashobora gusaba imbabazi mu gihe nawe abamwiciye bataramusaba imbabazi, nahisemo kwandikira urubuga rwandarwiza.unblog.fr, kugira ngo nanjye ntange igitekerezo cyanjye.

Koko Bwana Faustin Twagiramungu agomba gusaba imbabazi abanyarwanda ndetse abo mu bwoko bw’abahutu by’umwihariko.

Kuba Faustin Twagiramungu yarapfushije umuryango we ndetse n’inshuti muri 1994, ntabwo bimukuraho uruhare (responsabilité) mu rupfu no mu buzima bubi bw’abanyarwanda batabarika. Kuko siwe munyarwanda wenyine wapfushije ngo asigare ari nyakamwe. Ntabwo aha mvuze ko ari Bwana Twagiramungu wishe abo bantu cyangwa ngo abagirire nabi ariko imyitwarire y’uwo mugabo niyo yatumye abo batu bapfa cyangwa bakagirirwa nabi kugeza ubu.

Bwana Twagiramungu ati nanjye bazansabe imbabazi. Ese azazisabwa nande? Ndahamya ko wenda atunga agatoki abari muri MRNDD n’andi mashyaka ya Power yari afatanije nayo, abo bo wenda ibyabo sinabitindaho kuko nk’uko Bwana Twagiramungu yabivuze iyo bamufata muri Mata 1994 baba baramugize nk’uko bagize Madame Agatha Uwiringiyimana n’abandi banyapolitiki bari mu mashyaka yari ku ruhande rwa FPR (Nkeka kandi ndashidikanya ko impfu rw’aba banyapolitiki ari FPR yazungukiyemo cyane kuko iyo baba batarapfuye, ubu nabo baba barahunze nka bagenzi babo Twagiramungu, Rwigema, Gasana, Nkuriyingoma n’abandi bakoranye na FPR nyuma bagahunga).

Abo Bwana Faustin Twagiramungu agomba gusaba imbabazi:

-Abanyarwanda bose muri rusange bamwizeye bakamukurikira muri politiki ye ngo yo mu rwego rwo hejuru. -Aha navuga abo yashoye mu bikorwa by’urugomo hagati ya 1991-1994 ngo barahima Perezida Habyalimana. Ibikorwa by’uyu mugabo byatumye ingabo zari iza Leta zicika intege bigatuma FPR yinjira, kuko byaragaragaye ko Bwana Faustin Twagiraungu n’abo bari bafatanije barwanyije ubutegetsi bwa Perezida Habyalimana gusa nta n’umwe wigeze ugira icyo avuga ku bwicanyi bwa FPR ahubwo birirwaga bashinyagurira abavanywe mu byabo n’intambara ngo bahunze iki? (Aha nabaza Bwana Twagiramungu niba kugeza ubu ataramenya icyo abo baturage b’abanyabyumba na Ruhengeri bari barahunze?)

-Abitwaga amajyojyi yasigaranye nabo mugihe ikindi gice kinini cya MDR cyari kiyobowe na Froduald Karamira cyajyaga ku ruhande rwa Habyalimana. Abo bantu barishwe cyane muri 1994 kubera kuregwa gukorana na FPR, abo imihoro y’interahamwe n’udufuni twa FPR byasize, nibo bahise bahitira mu ma gereza baregwa genocide, s’ibyo gusa kuko abarokotse bo mu majyojyi ubu nibo baregwa muri gacaca, abandi ingengabitekerezo. Kubera ngo ko Bwana Twagiramungu yabeshywe na FPR nawe akababeshya!

RTEmagicC_Twagiramungu_02.jpg

Twagiramungu ari kumwe na Kanyarengwe

-Abanyarwanda bari bafite ubushobozi bwo guhunga mu 1994, bagumye mu Rwanda cyangwa bagera nuri Congo baragaruka bizeye ko kubera ko Bwana Twagiramungu yari Ministre w’intebe azabarwanaho ntibahohoterwe. Ndababwira ko ntacyo yabamariye abapfuye barapfuye kugeza n’i Kibeho.  Kubera ko ngo FPR yabeshye Bwana Twagiramungu nawe akababeshya!

Abo bantu bose yari yaragaruye mu Rwanda, cyangwa batahunze kubera we yaranyonyombye muri 1995 aba arigendeye atabasezeye cyangwa ngo ababurire nabo bahunge (Ubu wenda Lt Col Cyiza n’abandi baba bakiriho). Nta gushidikanya ko Bwana Twagiramungu ari muri bamwe batumye Leta ya FPR yizerwa n’amahanga, ibibi iyo Leta yakoraga n’ubu igikora bikirengagizwa.

Ntabwo yashizwe mu 2003 aba aragarutse, nk’umunyapolitiki w’inararibonye yabonaga ko mitingi ze hazagamo abantu mbarwa, abenshi babaga ari abademayi (DMI) cyangwa IBINGIRA na KAYONGA rimwe na rimwe baje gutera ubwoba. Yagombye kuba yarabirebeyeho akagira inama abamushyigikiye bakicecekera nawe akitahira mu bubirigi aho kubasiga mu menyo ya rubamba ngo anyonyombe nawe yigendere. Ese ubundi ko ngo yiyamamazaga ku giti cye iyo atsinda yari gutegekana na nde?

Naraniza mvuga ko Bwana Twagiramungu akenewe muri politiki kuko ni inararibonye, ariko agahindura imikorere  ntakajye ashora abantu ngo nabona rukomeye anyonyombe yigendere. Arakenewe nk’umujyanama w’abafite amaraso mashya, agasaba imbabazi, akagira inama abato muri politiki bakirinda imitego nk’iyo nawe yagiye agawamo. Kuko we izina rye ryamaze kwangirika nta munyarwanda mpamya ko yatiyuka kumwizera.

Murakoze

 

Manirakiza Albert

Gasabo

NB: iki ni igitekerezo cy’uwatwandikiye si igitekerezo cy’ubwanditsi  bwa rwandarwiza.unblog.fr

 


2 commentaires

  1. Pardon dit :

    Njye ndi Umunyarwanda usanzwe sindi umunyapolitiki ,amahano yatugwiririye muri 1994 yaduhumuye amaso .Twibukiranye ko ubu tugeze mukinyejana cya 21 aho mentalité zevoliwe « La Politique c’est un art ,qui n’est pas fait pour tout le monde .Quelqu’un qui se proclame politicien doit la maitriser et assumer ses conséquences.

    Ngarutse kuri iyi débat,ihuje Bwana Twagiramungu ,Manirakiza ALbert na Haguma Marcel ,nsanga Manirakiza na Haguma inama bagira Bwana Twagiramungu ari inama nziza cyane kuko l’erreur est humain kandi gukosa mumuco wacu bigendana no gusaba imbabazi ,igishimishije muri byose ni uko na bwana Twagiramungu yabyiyemereye ,aho avuga ko FPR -Inkotanyi zamushutse ,akaba anongeraho ko ubu yamenye ko FPR-Inkotanyi zarimbuye Abanyarwanda batagira ingano guhera itariki 01.10.1990 ,ugaca i Kibeho ,zaire kugera magingo aya ! Nonese izindi mpaka n’iziki ?

    « Faustin Twagiramungu yaharaniye Demokarasi, barayimwima. Bayimwimye ku butegetsi bwa Habyarimana, bayimwima ku butegetsi bwa Kagame, na n’ubu aracyayiharanira. Kwima Demokarasi Twagiramungu ni ukuyima Abanyarwanda bose. » Aya magambo yabwana Ismail Mbonigaba ni ayokwitondera ,niba abona Bwana Twagiramungu nk’ikigirwamana cye ni uburenganzira bwe ,ariko umuntu wese afite uburenganzira bwo kunenga uwo ashaka ,igihe ashakiye!apfa kuba gusa afite gihamya yibyo anenga undi .Muri Politiki amakosa nkayo Twagiramungu yakoreye Abanyarwanda ntasabirwa imbabazi gusa, ahubwo mubindi bihugu byateye imbere « uwo munyapolitike ahita yibwiriza agasezera kubirebana na politike byose « .Jamais dans le monde entier, un politicien n’avoue à son peuple qu’on l’a enduit en erreur ? ça veux dire quoi ? Iyo ntabwenge(kureba kure) ugira ntabwo ujya muri politiki .

    Bwana Twagiramungu ,yagombye kuba arimo kubyina itsinzi ,guhera 06.04.1994 kugeza igihe azatabarukira kuko guhera 1990 yaririmbaga ko ngo Président Habyarimana ntavaho Impundu zizavuga !Bref yagombye kuba arimo kuvuza impundu !Aho kugirango yumve Président Habyarimana wamubwiraga ko barimo kugurisha igihugu cyabo no gusubiza abanyarwanda kuburetwa !!!yavuniye ibiti mu matwi ,aba umusare wambutsa Kagame amwereka ahari umuhengeri .Njye ikinu kimbabaza ni kimwe kuba yiyemera ko azi « amateka y’u Rwanda ????????????Amateka y’Urwanda yarazwe cyane na Tutsi-Hutu !!!Nk’umuntu washubije ubwenge kugihe n’aho urwanda rwari rugeze muri 1990 ,asanga byari ngombwa ko FPR-Inkotanyi yoreka igihugu cyose kugirango Kagame abe Président na Bwana Twagiramungu abe premier ministre ? koko ?

    Traumatisme dufite nkabanyarwanda ,abanyepoliticiens bose aho bava bakagera ,bagomba kwirinda kwiyemera ,bakumva akababaro kacu mbere yabyose !kuko ibyabaye mugihugu cyacu atari impanuka ni ibyateguwe ,birimo kutubaho .Kugirango abanyarwanda bashobore kwiyubaka nuko buri muntu wese wari ujijutse muri 1990 ,yakwicisha bugufi akemera ibyari ishingano ze (ibyo atashoboye gukora ibyo yakoze nabi cg aho yibeshye akabisabira imbabazi ).

    Twese hamwe tuzatsinda .

  2. Ismail Mbonigaba dit :

    Ndifuza gusubiza Haguma Marcel ndetse na Manirakiza Albert ku ngingo imwe irebana n’icyo bita gusaba imbabazi, ibindi bizagarukwaho uko ibiganiro bizajya byicuma. Ubundi dukunze kwibwira ko gukoresha amagambo menshi ndetse n’ubukana ari byo bituma umuntu yumvikana, ariko si byo na gato. Nko mu butumwa bwatanzwe n’aba bantu navuze hejuru, dushobora kwibaza tuti » ni iki kigamijwe? » Gufasha Bwana Twagiramungu guhinduka uko bifuza? Kumuca umutwe(assassinat politique)? Ese bo bazwiho iki ku giti cya bo ngo bifatwe ko hari urugero bagamije gutanga?
    Ku birebana no gutegeka Bwana Twagiramungu gusaba imbabazi, birakwiye ko ababyifuza bakwirinda kuvuga ko icyaha yakoze ari icyo kurwanya ubutegetsi. Ushobora kwibwira ko ubutegetsi ari bwiza ukabuvuga imyato kubera indonke ubufitemo, ariko nta butegetsi bushobora gutunganira abantu bose. Nkaba rero nabwira abashaka gukora politiki ko iyo utishimiye système, ukagira ubwenge bukumvisha ko ushobora gukora ibyiza kurusha abari ku butegetsi, urabarwanya. C’EST LÉGITIME ». Iyo abari ku butegetsi bemera ko kubujyaho bihatanirwa mu matora, bemerera ubishaka wese kandi abishoboye kujya mu ihiganwa. Ibyo byitwa Demokarasi. Abatakaje ubutegetsi na bo, ntibaheka amaboko ngo bahugire « mu kubogoza » (se lamenter) ngo kuki uriya yagenje kuriya ngo afate ubutegetsi? Abavuga ba tyo nta bwo ari abanyapolitiki. Ku bw’ibyo, Faustin Twagiramungu yaharaniye Demokarasi, barayimwima. Bayimwimye ku butegetsi bwa Habyarimana, bayimwima ku butegetsi bwa Kagame, na n’ubu aracyayiharanira. Kwima Demokarasi Twagiramungu ni ukuyima Abanyarwanda bose. Ni nde ugomba gusaba imbabazi Abanyarwanda? Haguma na Manirakiza nibansubize.

    Ismail Mbonigaba
    Komiseri w’Itangazamakuru
    RDI Rwanda Rwiza

Répondre

archivesallahalwatanalmalik |
pk2012legislatives |
rectificador |
Unblog.fr | Créer un blog | Annuaire | Signaler un abus | thevoiceofpresidentielles
| legislative2012
| cournonpartisocialiste